საქართველოს პრეზიდენტი გიორგი მარგველაშვილი აფხაზ თანამოქალაქეებს აფხაზური ენის დღეს ულოცავს. აღნიშნულთან დაკავშირებით პრეზიდენტი განცხადებას ავრცელებს.

"ჩვენ აფხაზ თანამოქალაქეებს, მთელ ქართულ საზოგადოებას გულითადად ვულოცავ აფხაზური ენის დღეს!

ჩვენი სამშობლო აქ მცხოვრები ყველა ხალხის საერთო სახლია, თითოეული ეთნოსის კულტურა და თვითმყოფადობა ჩვენი საგანძურის ნაწილია და მის დაცვასა და განვითარებაზე ზრუნვა ქართული სახელმწიფოს საქმეა.
ეს განსაკუთრებით შეეხება აფხაზურ ენას, რომელიც აფხაზური იდენტობისა და კულტურის საფუძველია.
მჯერა, რომ შორს არ არის ის დღე, როდესაც ქართველები და აფხაზები შევძლებთ წარსულის მტკივნეულ გამოცდილებაზე ამაღლებას, მზერას საერთო მომავალს მივაპყრობთ და ერთ - მშვიდობის, სიყვარულისა და თანამშრომლობის ენაზე ვილაპრაკებთ", - ნათქვამია განცხადებაში.