,,გრიგოლია იძულებით დავაბრუნე ჟურნალისტიკაში... სად არის ქდმ? უი, აღარ არის?“

,,გრიგოლია იძულებით დავაბრუნე ჟურნალისტიკაში... სად არის ქდმ? უი, აღარ არის?“ - ივანიშვილი

პოლიტიკა - 15:53, 27 Oct, 2015

8952

ექსპრემიერი ბიძინა ივანიშვილი მიიჩნევს, რომ პოლიტიკური თოქ-შოუების დახურვის შემდეგ ატეხილი აჟიოტაჟი ხელოვნურად გაზვიადებულია.

მისი თქმით, არაობიექტურია ინგა გრიგოლიას განცხადებები, რომელიც მან „რეაქციის“ დახურვის შემდეგ გააკეთა.

„ინგა გრიგოლიას სურს მომაწეროს, რომ მე მას ვებრძვი. ობიექტური ამაში არაფერია, გარდა იმისა, რომ ინგა გრიგოლიას კარიერულ ზრდაზე მოვახდინე გავლენა და ის გაღიზიანებულია. როდესაც გრიგოლია იყო ერთ-ერთი ფსევდო ოპოზიციური პარტიის ლიდერი, ჩემი პოლიტიკაში მოსვლის შემდეგ ეს პარტიები ვამხილე... ვამხილე რამდენიმე პარტია, მათ შორის "ლეიბორისტული პარტია","ახალი მემარჯვენეები" და ქდმ, რომელიც აქტიურად თანამშრომლობდა „ნაციონალურ მოძრაობასთან“ და ატყუებდა საკუთარ საზოგადოებას. ისინი უფრო საშიშები იყვნენ, ვიდრე "ნაციონალური მოძრაობა". სხვათაშორის სად არის ქრისტიან-დემოკრატიული პარტია დღეს? უი აღარ არის ცალკე პარტია? გრიგოლიას განაღდებული ჰქონდა დეპუტატის ადგილი პარლამენტში და მისთვის საბედნიეროდ თუ საუბედუროდ, ჩემი მოსვლის შემდეგ ბევრი რამ შეიცვალა და მას ალბათ გაღიზიანება აქვს, რადგან ის იძულებით დავაბრუნე ჟურნალისტიკაში“, - განაცხადა ივანიშვილმა.