ყველა პოლიტოკოსი დამნაშავეა ხალხის დაბეჩავებასა და ქვეყნის დაქცევაში- მუხრან ბურჭულაძე

პოლიტიკა - 19:08, 26 Oct, 2015

1181

პარტია "ლიბერალ-დემოკრატების" ლიდერი მუხრან ბურჭულაძე პოლიტიკოსებს მიმართავს და მათ გულგრილობაში და უმოქმედობაში ადანაშაულებს. როგორც ბურჭულაძე აცხადებს, დამნაშავეა ყველა ის პოლიტიკოსი ვისაც შეეძლო უსამართლობას და განუკითხაობას წინ აღდგომოდა და ეს არ გააკეთა:

"ყველა პოლიტოკოსი დამნაშავეა ხალხის დაბეჩავებასა და ქვეყნის დაქცევაში, ვინც თუნდაც გულგრილად შეცქერის ამ პროცესს. თითო აგური ყველამ დადეთ ამ მარაზმისა და უბედურების საშენებლად, ყველამ ვისაც შეგეძლოთ უსამართლობის, განუკითხაობის, ერის დახლეჩისა და ეკონომიკური კოლაფსის წინააღმდეგ სვლა და ეს არ გააკეთეთ! დიახ ბრალს გდებთ უმოქმედობაში, რადგან თქვენი ვალია ხალხის კეთილდღეობას ემსახუროთ, დიახ მიგიძღვით უდიდესი წვლილი ამ ბოროტებაში, რადგან უცვლით ხალხს წარმოდგენას თავისუფლებისა და სამართლიანობის შესახებ, დიახ დაუკარგეთ ერს იმედი და ამბიცია იმისა, რომ საქართველოს შეუძლია იყოს ერთ-ერთი მაგარი და თითით საჩვენებელი მსოფლიოში, დიახ დამნაშავეები ხართ რადგან არაფერს აკეთებთ, რომ წინ აღუდგეთ ერის დაჩაჩანაკებას და ეგუებით იმ აზრს, რომ ქართველი შეიძლება იყოს მათხოვარი და უფასო სადილზე დამოკიდებული! სახელმწიფო ჭორისა და აგრესიის ბუდედ აქციეთ, ხალხი ყიდულობს და იკვებება კომპრომატებით, ჰყიდით მხოლოდ შუღლს და ამ ფულით ისევ ბოროტებას აწარმოებთ! მინდა ჩვენს მამულიშვილებს ვუთხრა - დავუთმოთ ყოველი წუთი თუ დღე განვითარებას, საქმეს, ერთობასა და ყველაზე ძლიერი სახელმწიფოს შენებას, ავიღოთ პასუხისმგებლობა ყველამ ერთად და ვიაროთ მძიმე და მართალი გზით, ვაშენოთ სიყვარული და პატივისცემა. მწამს რომ ეს იდეა ყველას გვაერთიანებს და მას ყველა ერთად შევასხამთ ხორცს! ჩვენ როგორც ღირსეული და დიდი წარსულისა თუ მომავლის ერი ამაყად ვივლით თავისუფლებისკენ მიმავალ გზაზე. ჩვენ უარი უნდა ვთქვათ მუქთა ლუკმაზე და დავიხარჯოთ შრომაში, რომ ჩვენვე ვამდიდროთ ქვეყანა და არა პირიქით, რადგან ზოგჯერ ვსაუზმობთ, რომ შემდეგ ვიშრომოთ, ზოგჯერაც პირიქით - ვშრომობთ რომ ვივახშმოთ, დღეს კი უზმოზე მოგვიწევს შრომა, ესაა სიმართლე რაოდენ მძიმე მოსასმენიც არ უნდა იყოს. მინდა თქვენც გიხაროდეთ მეგობრებო იმ სიხარულით, რომელსაც ახლო მომავალი გვიმზადებს. აწმყო არის მწარე გაკვეთილი და ეს წარსულში უნდა დავტოვოთ, წინ დიდი წარმატებებია და ის თითოეულ თქვენგანს ეკუთვნის!"- აცხადებს მუხრან ბურჭულაძე.