უახლოეს მომავალში ალექსი ახვლედიანი სრულ სიმართლეს იტყვის

უახლოეს მომავალში ალექსი ახვლედიანი სრულ სიმართლეს იტყვის - ნიკა გვარამია

პოლიტიკა - 16:07, 26 Oct, 2015

2981

ტელეკომპანია „რუსთავი2“-ის გენერალური დირექტორის განცხადებით, ის სრულად აგებს პასუხს მის დაშანტაჟებასთან დაკავშირებით გაკეთებულ განცხადებაზე და დარწმუნებულია, რომ ამ ფაქტთან დაკავშირებით ალექსი ახვლედიანი მალე სრულ სიმართლეს იტყვის.

„მე სრულად ვაგებ პასუხს იმ განცხადებაზე, რაც გავახმაურე. მთავრობა ჩემი მეგობრის, ალექსი ახვლედიანის შუამავლობით პირადი ცხოვრების ამსახველი ჩანაწერებითა და კოლეგების თვალში განადგურებით მემუქრებოდა. დარწმუნებული ვარ, უახლოეს მომავალში ალექსი ახვლედიანი სრულ სიმართლეს იტყვის" - აცხადებს ნიკა გვარამია.

ტელეკომპანიის გენდირექტორი ადასტურებს იმ ფაქტს, რომ მას საქართველოს მე-3 პრეზიდენტთან სისტემატური კონტაქტი აქვს. თუმცა, როგორც გვარმაია აცხადებს სააკაშვილთან საუბარი მისგან მითითების მიღებას არ ნიშნავს:

"ხელისუფლებისთვის სააკაშვილი იმდენად ტოქსიკური ადამიანია, რომ მასთან ნებისმიერი ტიპის საუბარი კომპრომატი ჰგონიათ. ვადასტურებ, სააკაშვილთან მართლაც ხშირად და ბევრ თემაზე ვსაუბრობ, მათ შორის, "რუსთავი 2"-ზეც. ის ჩემი მეგობარია და მისი აზრი ნებისმიერ საკითხზე ყოველთვის მაინტერესებს. სააკაშვილთან საუბარი მითითებების მიღებას არ ნიშნავს... ფაქტია, რომ ხელისუფლებას როგორც რეგიონებში, ისე თბილისში ჩატარებული მრავალათასიანი კონცერტების შეეშინდა. ქიბარ ხალვაში პირველად მაშინ გამოჩნდა, როდესაც ბათუმში ტელეკომპანიის ორგანიზებულ კონცერტზე 50 ათასი კაცი მოვიდა. უამრავმა ადამიანმა ტელეკომპანიას სოლიდარობა გამოუცხადა და ეს აღიზიანებთ!“- აცხადებს გვარმია.

ნიკა გვარამიას განცხადებით „რუსთავი 2“-ის საქმის მოსამართლე თამაზ ურთმელიძე ხელისუფლების მიერ დაქირავებული ზონდერია, ამიტომ გვარამიასთვის მისი გადაწყვეტილება არალეგიტიმურია და შესაბამისად არ აპირებს მას დაემორჩილოს.

"რუსთავი 2"-ის შენობას ნებით არ დავტოვებ, რადგან ურთმელიძე მოსამართლე კი არა, დაქირავებული ზონდერია.
შესაბამისად, მისი გადაწყვეტილებაც ჩვენთვის არალეგიტიმურია. არ ვიცი, სახელმწიფო რას გადაწყვეტს, არაფერს გამოვრიცხავ, რადგან ეს ხელისუფლებაც წინამორბედის შეცდომებს იმეორებს. გადავა თუ არა პროცესები ქუჩაში, მომავალი გვიჩვენებს. კანონის ფარგლებში ყველა მიმართულებით ვიბრძოლებთ...“- აცხადებს გვარამია.

სრულად იხილეთ ლინკზე "კვირის პალიტრა"