ქიბარ ხალვაშის შეთავაზება "რუსთავი 2"-ის ჟურნალისტებს

პოლიტიკა - 15:50, 26 Oct, 2015

9684

ტელეკომპანია „რუსთავი 2“-ისთვის მოდავე ბიზნესმენ ქიბარ ხალვაშის განცხადებით, „ნაციონალური მოძრაობის“ მიზანი სასამართლო დავის პოლიტიკურ სიბრტყეში გადატანაა და ისინი ამას სიტყვის თავისუფლებისთვის ბრძოლით ნიღბავენ. ამასთან დაკავშირებით ქიბარ ხალვაშმა გაზეთ „კვირის პალიტრასთან“ ინტერვიუში ისაუბრა:

"მათი მიზანი ნათელია - სასამართლო დავა პოლიტიკურ სიბრტყეში გადაიტანონ და საკუთარი ქმედებები სიტყვის თავისუფლებისათვის ბრძოლად შენიღბონ. კარგად იციან, რომ არჩევნების გზით ხელისუფლებაში ვერასოდეს დაბრუნდებიან, ამიტომ მაქსიმალურად ცდილობენ, "რუსთავი 2"-ის თემა ქვეყანაში არეულობის მოსაწყობად გამოიყენონ. მიუხედავად ყველაფრისა, "ნაციონალური მოძრაობა" საზოგადოების თვალში იმდენად დისკრედიტირებულია, რომ ქაოსური ვითარების შესაქმნელად არანაირი რესურსი არ გააჩნია... საზოგადოებამ კარგად იცის, რომ ჩემი სიმართლის დასამტკიცებლად 2008 წლიდან ვიბრძვი, თუმცა უშედეგოდ. სამართლებრივი ბრძოლისთვის ერთადერთი გზა დამრჩა - სასამართლო...

საპარლამენტო არჩევნებს, რომ დავლოდებოდი და სარჩელი ახლა არ შემეტანა, ხანდაზმულობის ვადა ამოიწურებოდა და მომავალში სასამართლოსთვის მიმართვის უფლებაც კი აღარ მექნებოდა.

თანამშრომლების სახელფასო დავალიანება გადავიხადე. ამასთან, სხვადასხვა ფონდიდან აღებული ვალები გავისტუმრე, სიგნალის გადაცემისთვის აუცილებელი ძვირადღირებული აპარატურა შევიძინე. ეს ყველაფერი დოკუმენტებში დაფიქსირებულია. რაც შეეხება სასამართლო დავას, ნურავინ შეიქმნის წარმოდგენას, რომ ხალვაში "რუსთავი 2"-თან დაკავშირებულ ინვესტიციაზე დაობს და კომპენსაციას ითხოვს. იქიდან გამომდინარე, რაც ტელეკომპანიის გამო გადავიტანე, არ ვიქნები მართალი, მრავალწლიანი ბრძოლა დავთმო“- აცხადებს ხალვაში. მისი თქმით ის მხოლოდ მისი განხორციელებული ინვესტიციების გამო არ დავობს არამედ ის აპირებს, რომ ტელეკომპანია სააკაშვილის და ენმ-ს დიქტატისგან გაათავისუფლოს:

„ჩემი ამოცანა ისიც არის, რომ "რუსთავი 2" სააკაშვილისა და "ნაციონალური მოძრაობის" დიქტატისგან გათავისუფლდეს. არაერთხელ გამოვიწვიე ყარამანიშვილები და "რუსთავი 2"-ის რეალური პატრონი სააკაშვილი ტელედებატებში, რათა ყველა საკითხზე საჯაროდ გვესაუბრა, მაგრამ არავინ გამომხმაურებია.

სააკაშვილი ყველაფერს გააკეთებს, რომ გვარამიასთან ერთად "რუსთავი 2"-თან დაკავშირებული სამართლებრივი დავა პოლიტიკურ სიბრტყეში გადაიტანოს და ტელევიზიიდან პოლიტიკური მიზნების განხორციელებას შეეცადოს. მეც ყველა ღონეს ვიხმარ, რომ ეს ვერ შეძლონ და ტელევიზიის ფუნქციონირება არ შეფერხდეს.“- აღნიშნავს ხალვაში და ტელეკომპანიაში დასაქმებულ ჟურნალისტებს შეთავაზება უკეთებს:

„ყველა თანამშრომელი, რომელთაც მიაჩნიათ, რომ მათი უპირველესი მოვალეობა ჟურნალისტური სტანდარტების დაცვა და თავისუფალი სიტყვის ერთგულებაა, "რუსთავი 2"-ში მუშაობას გააგრძელებს.“- აცხადებს ხალვაში.

სრულად იხილეთ ლინკზე "კვირის პალიტრა"