თვალთვალი და უკანონო მიყურადება - გვარამია სამართალდამცავი უწყებებისგან განმარტებას ითხოვს

პოლიტიკა - 15:10, 26 Oct, 2015

2379

ტელეკომპანია „რუსთავი 2“-ის გენერალური დირექტორი ნიკა გვარმაია სამართალდამცავების მხრიდან „რუსთავი2“-ის მიმდებარე ტერიტორიის მონიტორინგთან დაკავშირებით საუბრობს და აცხადებს, რომ მათ ოფიციალური უწყებების მხრიდან არ მიუღიათ ახსნა-განმარტება, რა მიზეზების გამო დადგა ტელეკომპანიის თვალთვალზე აყვანის საჭიროება.

გვარამიას თქმით, უწყებების მხრიდან ახსნა განმარტებების დაგვიანება, ქმნის ეჭვს, რომ ტელეკომპანიაზე მიზანმიმართული თვალთვალი ხორციელდება და ამ მხრივ შესაძლოა სამართალდამცავების მხრიდან უფლება-მოვალეობების გადაჭარბებას ჰქონდეს ადგილი.

"მივმართავთ ხელისუფლებას, შინაგან საქმეთა სამინისტროს და სახელმწიფო უსაფრთხოების სამსახურს. აქამდე ჩვენთვის არავითარი ახსნა განმარტება არ ყოფილა, თუ რატომა არის კამერები ტელეკომპანია „რუსთავი 2“-ის შენობის გარშემო, გარდა ზოგადი განცხადებისა. ჩვენ არ მიგვიღია ახსნა-განმარტება. ეს არის მედია დაწესებულება. აქ შემომსვლელ-გამსვლელთა დაცვის ინტერესი მაღალია. აქ შეიძლება კონფიდენციალური შეხვედრები მიმდინარეობდეს. ჩვენ თავისუფლად ვერ ვმუშაობთ. ეს არ არის ჩვენთვის დაუძლეველი შეფერხება, თუმცა თუ ახსნა-განმარტებას ვერ მივიღებთ ჩნდება ეჭვი, რომ ეს მიმართულია ჩვენი გადაადგილების საკონტროლებლად და ჩვენთან შემოსული და გასული ადამიანების აღსარიცხავად და მათზე ზეწოლის განსახორციელებლად. ამიტომ ორივე სამსახურს მოვუწოდებთ მოხდეს ახსნა-განმარტების გაკეთება. წინააღმდეგ შემთხვევაში ჩვენ ამ ქმედებას განვიხილავთ, როგორც უფლებამოსილების გადამეტებად კომპეტენტური ორგანოების მხრიდან, რომელიც ჩვენს წინააღმდეგაა მიმართული. არ გამოვრიცხავ, რომ სადმე მოსასმენი აპარატურაც იყოს დამონტაჟებული“, - განაცხადა გვარამიამ.