პრემიერის თქმით, რუსეთთან ურთიერთობის დალაგება სუვერენიტეტისა და ტერიტორიული მთლიანობის ხარჯზე ვერ მოხდება.

ამის შესახებ ირაკლი ღარიბაშვილმა სამხრეთ კავკასიის უსაფრთხოების მესამე ფორუმზე განაცხადა.

თუმცა მთავრობის მეთაურის განცხადებით, ოკუპაციის ფონზე პასუხისმგებელი და პრაგმატული ურთიერთობები რუსეთის ფედერაციასთან აუცილებელია.

„ამ მიზნით ჩვენ გადავდგით კონკრეტული ნაბიჯები რუსეთთან ვაჭრობის, სატრანსპორტო კომუნიკაციების და ტურიზმის ხელშესაწყობად. ამ დიალოგს არ აქვს ალტერნატივა და ჩვენ კიდევ ერთხელ ვადასტურებთ ამ კეთილგონივრულ მიდგომას. ამის მიუხედავად ცალსახად ვაცხადებ, რომ ურთიერთობები რუსეთთან ვერ დალაგდება ჩვენი სუვერენიტეტისა და ტერიტორიული მთლიანობის ხარჯზე. ასევე შემიძლია, დაგარწმუნოთ, რომ ჩვენ არასდროს შევწყვეტთ ბრძოლას საქართველოს ტერიტორიული მთლიანობისთვის", - განაცხადა ღარიბაშვილმა.