"არც გვაინტერესებს არავის, ვისი არის ეს ტელევიზია, ან ვისი გახდება"- პრემიერი "რუსთავი2"-ზე

პოლიტიკა - 16:08, 24 Oct, 2015

1810

პრემიერ მინისტრის განცხადებით მმართველი გუნდისთვის აქტუალური არა „რუსთავი2“-ის მფლობელების ვინაობა, არამედ სამართლიანობის აღდგენაა. ირაკლი ღარიბაშვილის შეფასებით ხელისუფლება ოპოზიციურად განწყობილ ტელევიზიებს პრობლემად არ თვლის და თავისუფალი მედიის შეზღუდვას არ ცდილობს, ამასთანავე ღარიბაშვილს მიაჩნია, რომ არა მარტო "რუსთავი 2", არამედ "იმედი", "მაესტრო", "პირველი არხიც" ოპოზიციური ტელევიზიებია:

"რუსთავი 2-ის მფლობელის ვინაობა წლების განმავლობაში ჩვენთვის იყო აბსოლუტურად უცნობი. არც გვაინტერესებს არავის, ვისი არის ეს ტელევიზია, ან ვისი გახდება. ჩემთვის მთავარია ის, რომ ყველანაირი ტელევიზია მუშაობდეს საქართველოში. ჩემთვის მფლობელს არ აქვს მნიშვნელობა, მაგრამ სამართალი უნდა აღდგეს. მეც და ნებისმიერი მოქალაქეც ასე ვფიქრობთ. ეს არ ეხება მხოლოდ ტელევიზას, საწარმოს, სახლს თუ სხვას, რომელიც ასობით და ათასობით აქვთ წართმეული, მაგრამ ეს უნდა მოხდეს სამართლიანი, დამოუკიდებელი სასამართლოს მიერ და არა ჩვენი ჩარევით, ამიტომ ამ პროცესს ჩვენ აბსოლუტურად გავემიჯნეთ თავიდან. ჩვენ ვთქვით, რომ ეს რის დავა სააკაშვილსა და ტელევიზიის ყოფილ მფლობელს - ქიბარ ხალვაშს შორის. ეს კაცი 3 წელი ცდილობდა, ჩვენი დახმარებით რომ რაიმე გაეკეთებინა, მან ათსჯერ მიმართა პროკურატურას, მთავრობას, პარლამენტს ყველას მიმართა, რომ აღედგინა დარღვეული უფლებები, წართმეული ქონება, მაგრამ მის მსგავსად, საქართველოში არის ათასობით ადამიანი, რომელთაც დაკარგეს საკუთარი ქონება, სახლები. ჩვენ შეგნებულად არ ჩავერიეთ ამ პროცესში, რომ არ მიგვეცა საბაბი იმის თქმის, რომ ჩვენ ხელისუფლება ვცდილობთ, თავისუფალ მედიას ხელი შევუშალოთ. ეს არ მოხდება. გადახედეთ ნებისმიერ ტელევიზიას, რატომ არის მხოლოდ "რუსთავი 2" ოპოზიციური? ასევე "იმედი", "მაესტრო", "პირველი არხი" არის ოპოზიციური – ყველანი ოპოზიციურები არიან, მაგრამ ჩვენთვის ეს არ წარმოდგენს პრობლემას. რამდენიც უნდათ, იმდენი გვაკრიტიკონ, ოღონდ გვაკრიტიკონ ობიექტურად, ეს არის ჩემი პოზიცია ამ საკითხთან დაკავშირებით", - განაცხადა ღარიბაშვილმა.