ყველა მედიასაშუალება მიყვება ჯალათებისა და სადისტების დღის წესრიგს- ირაკლი ღარიბაშვილი

პოლიტიკა - 15:55, 24 Oct, 2015

2527

პრემიერ მინისტრმა ირაკლი ღარიბაშვილმა ქართული მედიასაშუალებების მუშაობა გააკრიტიკა და ისინი „ჯალათების და სადისტების დღის წესრიგით“ მუშაობაში დაადანაშაულა. აღნიშნული განცხადება ღარიბაშვილმა მარტვილში სტუმრობისას გააკეთა.

"ასჯერ როცა გეტყვიან, რომ მთავრობა უუნაროა და არაფერს აკეთებს , გიჩნდება ეჭვი, ხომ არ არის მართლა ასე, მითუმეტეს, რომ არ არსებობს ალტერნატიული წყარო და ამის გადამოწმების საშუალება არ გაქვთ, რომელიც სიმართლეს გეტყვით. ამიტომ ვეუბნები მინისტრებს, რომ უნდა ვიაროთ რეგიონებში და უნდა გითხრათ სიმართლე, ღიად მივიღოთ თქვენგან კრიტიკაც, მოვისმინოთ პრობლემებიც. ყველგან ასეა - ევროპაში, ამერიკაში არსებობს დაბალანსებული, ინფორმაციის მიღების ორი ალტერნატიული წყარო – ერთი შეიძლება იყოს ხელისუფლების საწინააღმდეგო, მაგრამ მეორე დამაბალანსებელია. ჩვენთან აბსოლუტურად უკუღმაა ყველაფერი. ყველა მედიასაშუალება მხოლოდ ნეგატივზეა ორიენტირებული და მიყვება ჯალათებისა და სადისტების დღის წესრიგს", - განაცხადა ირაკლი ღარიბაშვილმა.

პრემიერმა იმედი გამოთქვა, რომ ეს ყველაფერი დროებითია და მომავალში ქართული მედიასაშუალებების ხარისხი დაიხვეწება და აქცენტს არა ნეგატივზე არამედ პოზიტივზე გააკეთებს:

„თვითონ მედიასაშუალებებიც მიხვდებიან, რომ ასე გაგრძელება არ შეიძლება. მჯერა, რომ მათი მუშაობის ხარისხი დაიხვეწება და ყველა გაიგებს, რომ ხალხს აინტერესებს პოზიტივი, პროგრესი რომელიც ქვეყანაში ხვდება და არა ნეგატივი, ჩხუბი, ავტოავარია და ა.შ. თუ ჩვენ ერთმანეთს არ ჩავუსახეთ რწმენა, უკეთესი მომავლის იმედი, ასე ვერ გავუძლებთ – ვერც ერთი მთავრობა ვერ გაუძლებს, ვერც ერთი ხალხი ვერ გაუძლებს. ეს უნდა შეიცვალოს და მე მჯერა, რომ ჩვენ ამას დროთა განმავლობაში მივაღწევთ - მიუკერძოებელი გახდებიან მედიასაშუალებები. როცა ჩვენ რაღაცას ვაშავებთ, რა თქმა უნდა, უნდა გვითხრან, უნდა გააშუქონ პრობლემები, მაგრამ როცა მთავრობა მნიშვნელოვან რაღაც აკეთებს ხალხისთვის ბევრი მიმართულებით, კეთილი ინებონ ამ ადამიანებმა და მიგვატანინონ სათქმელი ხალხამდე" - აღნიშნა პრემიერ-მინისტრმა.