,,ახალი მემარჯვენეები“: ,,ხელისუფლების უსუსურობა საგანგაშოდ გამოიყურება“

პოლიტიკა - 12:36, 24 Oct, 2015

1448

ქვეყანაში შექმნილ ვითარებასთან დაკავშირებით ,,ახალი მემარჯვენეები” განცხადებას ავრცელებენ. როგორც პარტიის ოფისში დღეს გამართულ პრესკონფერენციაზე პარტიის ლიდერმა მამუკა კაციტაძემ განაცხადა, პოლიტიკური პარტიები და სამოქალაქო სექტორი, მთლიანად საზოგადოება ვალდებულია ხელი შეუწყოს ქვეყანაში სიტუაციის ნორმალიზებას. ,,ახალი მემარჯვენეების“ განცხადებით, არსებული ვითარება ცუდად აისახება ქვეყნის დემოკრატიულ განვითარებაზე და საფრთხეს შეუქმის მის ევრიპულ და ევროატლანტიკურ სტრუქტურებში ინტეგრირების პერსპექტივას.

,,ნიუპოსტი“ უცვლელად გთავაზობთ მამუკა კაციტაძის მიერ გაკეთებულ განცხადებას:

,,ბოლო პერიოდში ხელისუფლების მხრიდან მედია საშუალებებზე კონტროლის განხორციელების მცდელობას, პატიმართა მიმართ არაადამიანური მოპყრობის და სისასტიკის ამსახველი კადრების ტირაჟირებას მოჰყვა სიტუაციის დაძაბვა, რის შედეგადაც მასობრივი ხასიათი მიიღო შენობა-ნაგებობების დარბევამ, მკვეთრად გამოხატულმა აგრესიამ და ურთიერთშეურაცხყოფამ. ამ ყველაფრის შედეგად მოხდა პოლიტიკური ტემპერატურის აწევა და დაძაბულობის ესკალაცია, რამაც საფრთხე შეუქმნა სამოქალაქო მშვიდობას.

სამწუხაროდ, ამ სიტუაციაში საგანგაშოდ გამოიყურება ხელისუფლების უმოქმედობა და უსუსურობა საზოგადოებრივი წესრიგის და არეულობის ფაქტების აღკვეთის მიმართ. მეტიც, არსებობს სერიოზული ეჭვი, რომ ხელისუფლება არათუ ცდილობს ამ ქმედებების აღკვეთას, არამედ ეს ყველაფერი ორგანიზებულია სწორედ მის მიერ. კიდევ უფრო შემაშფოთებელია პრემიერ-მინისტრის, ჩვენი აზრით, სრულიად უპასუხისმგებლო განცხადება, რომელმაც სიტუაციის განმუხტვის ნაცვლად კიდევ უფრო წააქეზა და წაახალისა წესრიგის დამრღვევები.

რჩება შთაბეჭდილება, რომ ხელისუფლებამ ხელი დაიბანა პატიმართა მიმართ ჩადენილი სისასტიკის და არაადამიანური მოპყრობის ფაქტების დამკვეთების და შემსრულებლების გამოვლენასა და დასჯაზე და ნებსით თუ უნებლიეთ უბიძგა მოქალაქეთა ცალკეულ ჯგუფებს ე.წ. ლინჩის წესით ანგარიშსწორების დამკვიდრებისაკენ.

მიგვაჩნია, რომ ყოველივე ეს ცუდად აისახება ქვეყნის დემოკრატიულ განვითარებაზე და შესაბამისად, ჩვენს ევროპულ და ევრო-ატლანტიკურ პერსპექტივაზე და სერიოზულ საფრთხეს შეუქმნის ვიზალიბერალიზაციის რეჟიმის შემოღებას საქართველოსთვის, რაც მიმდინარე წლის ბოლოს უნდა გადაწყდეს.

ამ ყველაფერზე, ცხადია პასუხისმგებლობა მთლიანად ეკისრება ხელისუფლებას, რომელმაც საპარლამენტო არჩევნების წინ ძალაუფლების დაკარგვის შიშით ვერ სძლია ცდუნებას და საკუთარი მოქალაქეებისა და საერთაშორისო საზოგადოების თვალში ვერ მოახერხა ეჭქვეშ არ დაეყენებინა ქვეყანაში სასამართლო სისტემისა და მედიის თავისუფლება.

მოვუწოდებთ ხელისუფლებას, ამჯერად მაინც უზრუნველყოს საკუთარი კონსტიტუციური ვალდებულების შესრულება და სამოქალაქო მშვიდობის შენარჩუნება ქვეყანაში, რისთვისაც აუცილებელია: დამნაშავეთა კანონის მთელი სიმკაცრით დასჯა; მედიის თავისუფლების პრინციპების და სხვა დემოკრატიული ღირებულებების უპირობო დაცვა.

ჩვენ, „ახალი მემარჯვენეები“ მოვუწოდებთ პოლიტიკურ პარტიებს, სამოქალაქო სექტორის წარმომადგენლებს, მთელს საზოგადოებას და განსაკუთრებით ახალგაზრდობას, გამოვიჩინოთ სახელმწიფოებრივი პასუხისმგებლობა და ხელი შევუწყოთ ქვეყანაში სიტუაციის ნორმალიზებას; არ დავუშვათ, რომ ჩვენი ქვეყნის განვითარება საფრთხის ქვეშ დადგეს.

ყოველივე ზემოაღნიშნული მნიშვნელოვანწილად განაპირობებს, რომ 2016 წლის საპარლამენტო არჩევნები ჩატარდეს მშვიდ, თავისუფალ, კონკურენტუნარიან და სამართლიან გარემოში“, - ნათქვამია ,,ახალი მემარჯვენეების“ ლიდერი მამუკა კაციტაძის განცხადებაში.