"ყველაზე არაობიექტური სარედაქციო პოლიტიკა ნაკლებ საზიანოა, ვიდრე ეჭვი მედიათავისუფლებასთან დაკავშირებით"

პოლიტიკა - 15:47, 23 Oct, 2015

1241

საქართველოს ვიცე-პრემიერმა, საგარეო საქმეთა მინისტრმა გიორგი კვირიკაშვილმა ტელეკომპანია „რუსთავი 2“ საქმესთან დაკავშირებით ჟურნალისტების შეკითხვას უპასუხა. ვიცე-პრემიერის შეფასებით მედია თავისუფლება საქართველოს ხელისუფლების უმთავრესი ფასეულობაა და იგი განუხრელად იცავს ამ პრინციპს, მნიშვნელოვანია, რომ სასამართლომ გააკეთოს ყველაფერი, რათა ამ საქმის მიმართ ჩვენს პარტნიორებს შეკითხვები არ გაუჩნდეთ.

„მედიის თავისუფლება არის უმნიშვნელოვანესი ფასეულობა, რომელზეც ნებისმიერი მთავრობა უნდა იდგეს. ჩვენი მთავრობა ნამდვილად დგას ამ ფასეულობაზე. მინდა ყველა დავარწმუნო, რომ ყველაფერი გაკეთდება იმისათვის, რომ არცერთი მედია კომპანიის მაუწყებლობის პოლიტიკაში ჩარევა არ მოხდეს და არც ხდება. არ ვიცი ვინ იქნება ამ პროცესის გამარჯვებული, არ ვარ იურიდიული დეტალების საქმის კურსში, მაგრამ ვინც არ უნდა იყოს გაცილებით ნაკლები ზიანი შეიძლება მოუტანოს ქვეყანას თუნდაც ყველაზე არაობიექტურმა სამაუწყებლო სარედაქციო პოლიტიკამ, ვიდრე იმან, რომ თუნდაც რაიმე ეჭვი გაჩნდეს ჩვენს მეგობრებსა და პარტნიორებში ქვეყანაში მედია თავისუფლებასთან დაკავშირებით.“- განაცხადა გიორგი კვირიკაშვილმა.