"გვარამია მეგობარს რაღაცას ელაპარაკება და მერე ამას ისე გაყიდის, როგორც მას პოლიტიკურად აწყობს"

პოლიტიკა - 11:46, 23 Oct, 2015

3171

უმრავლესობის დეპუტატი ირაკლი სესიაშვილი ფიქრობს, რომ ნიკა გვარამიას განცხადების საფუძველზე დაწყებული გამოძიება გამჭირვალედ უნდა წარიმართოს იმისთვის, რომ საზოგადოებას კითხვები აღნიშნულთან დაკავშირებით აღარ ჰქონდეს.

ამის შესახებ სესიაშვილმა ჟურნალისტებთან საუბრისას განაცხადა.

"ბატონი ალექსანდრე, ნიკა გვარამიას მეგობარი უნდა დაიკითხოს. უნდა გაირკვეს, მართლაც ვიღაცამ დაავალა, თავისი ინიციატივით გამოთქვა ეს, თუ მეგობრულად საუბრობდა, ეს ყველაფერი უნდა გაირკვეს. მთავარი ჩვენი მხრიდან არის, რომ გამჭვირვალე პროცესი იყოს.

ჩვენი ხელისუფლების ინტერესია, რომ საზოგადოებაში რაიმე კითხვა არ გაჩნდეს. ნიკა გვარამია თავის მეგობარს რაღაცას ელაპარაკება და მერე ამას ისე გაყიდის, როგორც მას პოლიტიკურად აწყობს, ასე უბრალოდ არ გამოვა,“-განაცხადა ირაკლი სესიაშვილმა.

შეგახსენებთ, ალექსი ახვლედიანი გუშინ პროკურატურაში იმყოფებოდა. მან დაადასტურა, რომ 21 ოქტომბერს "რუსთავი 2"-ში იმყოფებოდა. საგამოძიებო უწყებამ ახვლედიანი გვარამიას დაკითხვის შემდეგ დაიბარა. როგორც ცნობილია სწორედ ახვლედიანი იყო შუამავალი მთავრობასა და გვარამიას შორის.