"მას თუ ასეთ კადრებზე რეაქცია არ აქვს, ცუდად ყოფილა მისი საქმე"

"მას თუ ასეთ კადრებზე რეაქცია არ აქვს, ცუდად ყოფილა მისი საქმე" - დეპუტატები პრეზიდენტის განცხადებაზე

პოლიტიკა - 13:43, 22 Oct, 2015

1491

უმრავლესობის დეპუტატები პრეზიდენტის განცხადებას ეხმაურებიან და ამბობენ, რომ ისინი სამოქალაქო დაპირისპირების საფრთხეს ვერ ხედავენ.

დეპუტატ გია ჟორჟოლიანის თქმით, არასწორია ასევე, რომ პრეზიდენტის მხრიდან მოწოდება გაკეთდა მოსამართლის მისამართით.

„ვერ ვხვედავ სამოქალაქო დაპირისპირების საფუძველს. სასამართლოს მიმართ მოწოდება არავინ არ უნდა გააკეთოს. არავინ არ უნდა მიმართოს მოსამართლეს არც პრემიერმა, არც პრეზიდენტმა და ხელისუფლების არც ერთმა წარმომადგენელმა. მოსამართლე დამოუკიდებელი უნდა იყოს. მოვუწოდებ ყველას, რომ თავი შეიკაონ სიტუაციის ესკალაციისგან და იმისგან, რომ სიტუაცია დავხატოთ ისე როგორც ეს ზოგიერთ პოლიტიკურ პარტიას სურს წარმოაჩინოს“, - განაცხადა ჟორჟოლიანმა.

გიორგი მარგველაშვილის განცხადებას ასევე უარყოფითად აფასებს დეპუტატი თამაზ მეჭიაური.

„პრეზიდენტს თუ ასეთ კადრებზე არ აქვს რეაქცია ცუდად ყოფილა მისი საქმე. მიჭირს მოუწოდო მოსახლეობას ასეთი კადრების ნახვის შემდეგ მოთოკონ ნერვები. თუმცა ყველას ვურჩევდი, რომ ყველა ასეთი საკითხი სამართლებრივად გაირჩეს. უბრალოდ, მოსახლეობას ყველაზე მეტად ნერვებს უშლის ის, რომ ვინც ასეთი ქმედების დროს ხელისუფლებაში იყვნენ, დღეს გამოდიან სამართალდამცველების და დაჩაგრულების როლში“, - განაცხადა მეჭიაურმა.