პრემიერმა დააფიქსირა, რომ მთელ ამ პროცესებში ის შეიძლება მხარეს წარმოადგენდეს

პრემიერმა დააფიქსირა, რომ მთელ ამ პროცესებში ის შეიძლება მხარეს წარმოადგენდეს - ფიქრია ჩიხრაძე

პოლიტიკა - 13:46, 22 Oct, 2015

1834

საქართველოს პრეზიდენტის განცხადებასთან დაკავშირებით დამატებითი განმარტება მისმა პოლიტიკურმა მრჩეველმა გააკეთა. ფიქრია ჩიხრაძის განცხადებით შექმნილ ვითარებაში იმ ადამიანის მხრიდან გაკეთებულ განცხადებას, ვინც ქვეყანაში კონსტიტუციური მშვიდობის გარანსტს წარმოადგენს დიდი მნიშვნელობა აქვს. ამასთანავე ჩიხრაძის თქმით კითხვის ნიშნები არსებობს მოსამართლის ქცევასთან დაკავშირებითაც, პრეზიდენტის მრჩეველმა მარგველაშვილის მოწოდება სწორედ სასამართლოს მხრიდან რთულ ვითარების გათვალისწინების საჭიროებით ახსნა. ჩიხრაძის თქმით გიორგი მარგველაშვილმა განცხადების გაკეთება პრემიერის მხრიდან მთავრობის სხდომაზე გაკეთებული მოწოდებების შემდეგ გადაწყვიტა.

"ძალიან დიდი მნიშვნელობა აქვს, რომ მოზომილი, ზომიერი გადაწყვეტილებები, შეფასებები ისმოდეს. განსაკუთრებით, იმ ადამიანების მხრიდან - ვინც ქვეყანაში კონსტიტუციური მშვიდობის გარანტი უნდა იყოს. საკვანძოა ის თემა, რომელიც რუსთავი 2-ის სასამართლო პროცესს ეხება, საკვანძოა მოსამართლის ქცევა, სადაც ბევრი კითხვის ნიშანი გაჩნდა, დიდი იმედი მინდა ვიქონიო, რომ ისევე როგორც ყველა თანამდებობის პირი, მოსამართლე რომელიც ამ საქმეს წარმართავს, აცნობიერებდეს იმ ძალიან რთულ ვითარებას, რომელშიც დღეს ჩვენი საზოგადოება იმყოფება. არანაირი საჭიროება ნაჩქარევი და ხისტი გადაწყვეტილებების არ არსებობს.

ჩვენ შეიძლება დღეს ასეთი განცხადება არ გაგვეკეთებინა, რომ არ მოგვესმინა ის შეფასებები, რაც დილით მთავრობის სხდომაზე პრემიერმინისტრისგან მოვისმინეთ, რომელმაც პრაქტიკულად გამოაცხადა, რომ მთელ ამ პროცესებში ის შეიძლება მხარეს წარმოადგენდეს. ვფიქრობ, რომ ეს იყო არასწორი. იმედი მინდა ვიქონიო, რომ ყველას, ვინც დღეს ხელისუფლებას წარმოადგენს, მათ შორის, აღმასრულებელი ხელისუფლების პირველი პირები გააცნობიერებენ, რომ მათ თითოეულ სიტყვას შესაძლოა, გადამწყვეტი მნიშვნელობა ჰქონდეს,“ - განაცხადა ფიქრია ჩიხრაძემ.