პრემიერი წამების კადრების გავრცელებაზე პირველ კომენტარს აკეთებს. მისი თქმით, გავრცელებულ კადრებში ჩანს, თუ როგორ ექცეოდნენ „ნაციონალური მოძრაობის“ წევრები მოქალაქეებს.

ღარიბაშვილმა მთავრობის სხდომაზე კონკრეტული შემთხვევა გაიხსენა, როდესაც მისი თქმით, მოქალაქე სახლიდან ღამის სამ საათზე გაიტაცეს.

„მე ვიცი ერთი ადამიანის ისტორია, რომელიც სახლიდან ღამის სამ საათზე მოიტაცეს, მას ჰყავდა სამი თვის ორსული მეუღლე, რომელსაც სახლში სასტიკად გაუსწორდნენ, მუცელიც მოეშალა, ეს კაცი წაიყვანეს და აწამეს ისე, როგორც თქვენ ამ ვიდეოში ნახეთ. იმს გამო, რომ მას არ ჩადენილი, შეუმდგარი დანაშული ვერ ააღებინეს საკუთარ თავზე, სხვა მიზეზით, ნარკოტიკების ჩადებით გაასამართლეს“- განაცხადა პრემიერმა.

ირაკლი ღარიბაშვილის თქმით, „ნაციონალური მოძრაობის“ წევრებს არანაირი უფლება არ აქვთ, რომ საზოგადოებას ისეთი ენით ელაპარაკონ, როგორც ლაპარაკობენ.

„დარწმუნებული ვარ, რომ საქართველოში ძნელად თუ მოიძებნება რამდენიმე ათეული ადამიანი, რომელიც მხარს უჭერს და რომლისთვისაც მისაღებია ის, რაც ამ ვიდეოებში ხდება. მაინტერესებს, რამდენი ადამიანია საქართველოში, რომელიც ასეთ დანაშაულებრივ, სასტიკ საქმიანობას მხარს უჭერენ. ასეთ ადამიანებს არ აქვთ უფლება, პოლიტიკაში დარჩნენ. ჩემთვის სააკაშვილი, მისი მთავრობა და მიმდევრები არიან სახე იმ ნიღბიანი ადამიანის, რომელიც ამ ვიდეოებში აუპატიურებენ ადამიანებს, ეს არის მათი სიმბოლო," - განაცხადა ღარიბაშვილმა.