თავდაცვის მინისტრის თინა ხიდაშელის თქმით, „რუსთავი 2“-ის გენერალური დირექტორის განცხადების საფუძველზე დაწყებული გამოძიების გასაღები თავად ნიკა გვარამიას ხელშია.

როგორც ხიდაშელმა მთავრობის სხდომის დაწყებამდე განაცხადა, თუ გვარამია ითანამშრომლებს სრულფასოვნად გამოძიებასთან უმარტივესი იქნება საქმის გამოძიება.

„მე ვუსმინე გუშინ ბატონ გვარამიას და გუშინვე დაიწყო გამოძიება, პროკურატურამ მას უწყისი უკვე ჩააბარა. აქ საკითხი ძალიან მარტივად არის. ამ საქმის უსწრაფესი გამოძიება, მასზე რეაგირება და პასუხი ყველა იმ კითხვაზე, რომელზეც ნიკა გვარამია საუბრობდა, მის ხელშია. გამოძიების გასაღები ნიკა გვარამიას ხელში უჭირავს. ის ან სრულფასოვნად ითანამშრომლებს გამოძიებასთან და იტყვის ვის, როდის, სად შეხვდა და რაზე იყო საუბარი. ამის შემდეგ საქმის გამოძიება უმარტივესი იქნება. ან არ ითანამშრომლებს და თქვენ მუდმივად გექნებათ იმის შესაძლებლობა, რომ მორიგი საუბრები გქონდეთ იმაზე, რომ არაეფექტურია ხელისუფლება“, - განაცხადა ხიდაშელმა.