"ვეუბნები ხელისუფლებას, თქვენს ოჯახებსაც შეეხებიან" - დავითაია გვარამიას დაშანტაჟებას აპროტესტებს

პოლიტიკა - 18:06, 21 Oct, 2015

1246

„ევროპელი დემოკრატების“ ლიდერის პაატა დავითაია, ნიკა გვარამიას მიერ გაკეთებულ განცხადებას, რომლის მიხედვითაც რუსთავი 2 - ის გენერალურ დირექტორს პოსტის დატოვების მოთხოვნით ვიდეოკადრების გამოქვეყნებით აშანტაჟებენ, იმ წითელ ხაზს უწოდებს, რომელიც ხელიუსფლებამ არ უნდა გადაკვეთოს.
"პოლიტიკაში არის გარკვეული ზღვარი, როცა ეხები ოჯახს, როგორი პოლიტიკური დაპირისპირება არსებობდეს ეს არის წითელი ხაზები რომელიც ძალან ცუდად მთავრდება იმისთვის, ვინც ამ ხაზებს გადაკვეთავს. ბოლო პერიოდში ყველა ცდილობდა განრიდებოდა ოჯახს. რა დონის პოლიტიკური დაპირისპირებაც არ უნდა ყოფილიყო, არავინ ცდილობდა მის მოგვარებას ოჯახზე შანტაჟის გზით. ვეუბნები ხელისუფლებას, თქვენს ოჯახებსაც შეეხებიან, ეს არის უკუ ძალა, რაც პირველ რიგში ავნებს ქართულ სახელმწიფოს" - აღნიშნა პაატა დავითაიამ.
მისი თქმით, იმაზე საუბარი, რომ სასამართლო არის მიუკერძოებელი და გადაწყვეტილება ხელისუფლების მიერ არ იქნება ნაკარნახევი სასაცილოა.
„ევროპელი დემოკრატების“ ლიდერი აცხადებს, რომ აუცილრბელია "რუსთავი 2 -ის დაცვა".
"ყველა უნდა მოვიდეს, პოლიტიკოსები, ექსპერტები უბრალო მოქალაქეები უნდა დავიცვათ ეს ტელევიზია. დღეს რუსთავს ხურავენ ხვალ ჩვენს ოჯახს მიადგებიან" - თქვა მან.