„ვპირდები მერს, რომ მე ვიქნები ის ადამიანი, რომელიც მის კარიერას დაასრულებს"-ამ სიტყვებით ეხმაურება გორის კულტურის ცენტრის ყოფილი დირექტორი ლექსო ვალიაური მის თანამდებობიდან გათავისუფლებას.

გორის მერმა ვალიაური დაკავებული თანამდებობიდან ბრძანების საფუძველზე 19 ოქტომბერს გაათავისუფლა.

ამის მიზეზად კი ბიუჯეტის არამიზნობრივი ხარჯვა დაასახელა.

"ბატონი ლექსო ვალიაური გათავისუფლდა დაკავებული თანამდებობიდან იმის გამო, რომ აუდიტის სამსახურმა შემოწმებისას აღმოაჩინა ბიუჯეტის არამიზნობრივი ხარჯვა. დეტალები მოგვიანებით იქნება ცნობილი"-აცხადებს გორის მერი.

ვალიაური კი ამბობს, რომ აუდიტის დასკვნაში საგანგაშო არაფერია და მისი გათავისუფლება მერს რეგიონის გუბერნატორმა დაავალა.

"მე რაიმე კონკრეტულ დარღვევებთან არასდროს არ მქონია კავშირი და არც არანაირი ინტერესი. მე მინდა გითხრათ, რომ ამ ყველაფრის უკან როგორც ჩანს იდგა გუბერნატორი, ბატონი ზურაბ რუსიშვილი, რომელმაც პირდაპირი ზეწოლა მოახდინა მერზე. მოახდინა ზეწოლა, აიძულა მოეწერა ხელი სრულიად უკანონოდ ჩემი გათავისუფლების ბრძანებისათვის. ფაქტები აუცილებლად იქნება წარდგენილი სასამართლოზე და აუცილებლად დადასტურდება ის, რომ ამ პროცესში ორივე პიროვნებამ ჩაიდინეს ჩემს წინაშე უსამართლო და უსაფუძვლო ქმედება"-აცხადებს ლექსო ვალიაური.

რეგიონის გუბერნატორი ვალიაურის განცხადებას ჯერ-ჯერობით არ გამოხმაურებია. ,,ნიუპოსტი" მის პრესცენტრთან დაკავშირებას შეეცადა თუმცა გიორგი ედიშერაშვილს ტელეფონი გათიშული აქვს.