რუსეთს საკუთარი გეოპოლიტიკური ინტერესები აქვს და მათი უგულებელყოფა არ შეგვიძლია

რუსეთს საკუთარი გეოპოლიტიკური ინტერესები აქვს და მათი უგულებელყოფა არ შეგვიძლია - ხაჯიმბა

პოლიტიკა - 14:00, 21 Oct, 2015

1638

ოკუპირებული აფხაზეთის დე ფაქტო პრეზიდენტმა, რაულ ხაჯიმბამ აფხაზეთში არსებული ეკონოკურ-პოლიტიკური ვითარება მიმოიხილა. შესაბამის დოკუმენტს ე.წ. პრეზიდენტის ოფიციალური ვებგვერდი ავრცელებს.

„20 წელზე მეტია ვაშენებთ ახალ, დამოუკიდებელ სახელწმიფოს. ამ დროის განმავლობაში ბევრი სირთულე გადავიტანეთ, თუმცა ერთიანობის წყალობით გავუძელით ომს, ბლოკადას, მივაღწიეთ ჩვენი დამოუკიდებლობის აღიარებას.

ბოლო წლებში რუსეთიდან მნიშვნელოვანი ფინანსური დახმარება მივიღეთ. თუმცა, სამწუხაროდ დიდი ნაწილი დანიშნულებისამებრ არ გამოყენებულა. ვისაც ამ რესურსებთან წვდომა ჰქონდა, საკუთარი კეთილდღეობა გაიუმჯობესა, მაშინ როცა მოსახლეობის უმეტესობა კვლავ მძიმე მატერიალურ მდგომარეობაშია“-აცხადებს ხაჯიმბა.

მისი თქმით, ამჟამად მარტივ ვითარებაში არც რუსეთი იმყოფება და იქ არსებული ვითარება ე.წ. აფხაზეთის ეკონომიკურ მდგომარეობაზეც აისახა.

დე ფაქტო პრეზიდენტის განცხადებით, გასულმა წელმა ნათლად აჩვენა, რომ აფხაზეთს საკუთარი შესაძებლობებით განვითარება, ბიუჯეტის ფორმირება და ფუნქციონირება შეუძლია. თუმცა , იმედოვნებს, რომ რუსეთის ფინანსრუი დახმარება კვლავ გაგრძელდება.

„არ შემიძლია არ აღვნიშნო, რომ 2009 წლიდან აფხაზეთი რუსეთისგან ეკონომიკური სახის დახამრებას იღებს. ერთი, ძალოვანი სტრუქტურების, განათლების, ჯანდაცვის სფეროების მიმართულებით, მეორე კი, ეკონომიკური რეფორმების განხორციელების მიმართულებით. წელს ჩვენ ვერ მივიღეთ დახმარება, რომელიც ეკონომიკის განვითარებისთვის იყო განკუთვნილი. ამის გამო ბიუჯეტის შესრულების კუთხით გარკვეული სირთულეები შეიქმნა. მიუხედავად ამისა, ჩვენ შევძელით და საგადასახადო შემოსავლის მაჩვენებელი შარშანდელთან შედარებით 500 მილიონი რუბლით გავზარდეთ" - განაცხადა ხაჯიმბამ.

"უნდა გვახსოვდეს, რომ რუსეთს საკუთარი გეოპოლიტიკური ინტერესები აქვს და ამ ინტერესების უგულებელყოფა არ შეგვიძლია. დღეს, რუსეთის დახმარებისა და ჩვენი შიდა რესურსების გაერთიანებით, ქვეყნის პოტენციალის გამყარებისა და ჩვენი ხალხის მრავალსაუკუნოვანი ოცნების - დამოუკიდებელი სახელმწიფოს შექმნის სრულყოფის შანსი გვაქვს - აღნიშნა ხაჯიმბამ.