ბრმა უნდა იყო, რომ ვერ ხედავდე, "რუსთავი2" -ის წინააღმდეგ მთელი სისტემის დაპირისპირებაა

ბრმა უნდა იყო, რომ ვერ ხედავდე, "რუსთავი2" -ის წინააღმდეგ მთელი სისტემის დაპირისპირებაა - თარგამაძე

პოლიტიკა - 11:39, 21 Oct, 2015

2506

ჟურნალისტმა და ყოფილმა პოლიტიკოსმა გიორგი თარგამაძემ გადაცემა „არჩევანში“ „რუსთავი2“-ის ირგვლივ მიმდინარე პროცესებზე საუბრისას ტელეიმედში განვითარებული მოვლენები გაიხსენა და აღნიშნა, რომ „რუსთავი ორს“, ისევე როგორც თავის დროზე ტელეიმედს მთელი სახელმწიფო სისტემა დაუპირისპირდა.

„ჩვენ გვქონდა შეგრძნება, რომ ჩვენ ვიყავით აბსოლუტურად დაუცველები, უსუსურები, რადგან ჩვენ გვიპირისპირდებოდა მთელი სახელმწიფო სისტემა და დღესაც აქ იმისთვის მოვედი, რომ ეს პარალელები გავავლო და ვთქვა, რომ ბრმა უნდა იყოს ადამიანი, რომელიც ვერ ხედავს, რომ კვლავ მთელი სისტემის დაპირისპირებაა ტელეკომპანია რუსთავი2-ის წინააღმდეგ.“ - განაცხადა გიორგი თარგამაძემ.

თარგამაძის თქმით, „რუსთავი2“ სატელევიზიო ბაზარზე ერთადერთი ტელევიზიაა, რომელსაც აქვს საშუალება, იყოს ე.წ. „მოდარაჯე ძაღლის“ პოზიციაში.

"პოლიტიკური პარტიები, ოპოზიცია, რომელმაც უნდა შეზღუდოს, დააბალანსოს და გავლენა მოახდინოს ხელისუფლებაზე, ამას ვეღარ ახდენენ. არასამთავრობო ორგანიზაციები ძალიან ეფექტურად მუშაობენ, მაგრამ მათ მუშაობას მნიშვნელობა საერთაშორისო ორგანიზაციებში აქვთ და საზოგადოება ამას არ ითვალისწინებს. პარლამენტი სრულიად ერთპარტიული გავლენის, ერთი კაცის გავლენის ქვეშ არის. ასევე მთავრობა. მონოპოლიზებულია პოლიტიკური ველი. ერთადერთი, რამაც შეიძლება შეზღუდოს ხელისუფლება ისევე, როგორც 2007 წელს, დღესაც არის დამოუკიდებელი მედიასაშუალება და ამ შემთხვევაში „რუსთავი2“. ანუ ჩვენი მთავარი პრობლემა შეუზღუდავი, უკონტროლო ხელისუფლება იყო. ეს რომ არ არსებობდეს, უნდა იყოს რამდენიმე პოლიტიკურად ძლიერი ინსტიტუტი. ერთადერთი, რაც დღეს არსებობს, არის კრიტიკულად მაუწყებელი ტელევიზია. რატომ „რუსთავი2“ და არა რომელიმე სხვა ტელევიზია? ამას კონკრეტული ახსნა აქვს. პირველი, ყველა დანარჩენ ტელევიზიას აქვს გაცილებით მეტი წინაპირობა, იყვნენ ლოიალურები ამ ხელისუფლების მიმართ. ასეთი წინაპირობა „რუსთავი2“-ს არ გააჩნიათ. თეორიულადაც კი შეუძლებელია, „რუსთავი2“ მთავრობას გაურიგდეს და შევიდეს რაიმე ტიპის ლოიალურ ურთიერთობებში." - აღნიშნა გიორგი თარგამაძემ.