„დემოკრატიის უკუსვლა"- EPP "რუსთავი 2"-ის ირგვლივ შექმნილ ვითარებას რეზოლუციით ეხმიანება

პოლიტიკა - 12:34, 21 Oct, 2015

1415

ევროპის სახალხო პარტია ტელეკომპანია „რუსთავი2“-ის ირგვლივ შექმნილ ვითარებას შემაშფოთებელს უწოდებს და განვითარებულ მოვლენებს სარედაქციო პოლიტიკისა და მფლობელის შესაცვლელად მიმდინარე კამპანიად აფასებს. ამასთან დაკავშირებით საუბარი EPP რეზოლუციაშიც იქნება, რომლის განხილვასაც პარტია დღეს მადრიდში აპირებს. რეზოლუციის სახელწოდება „დემოკრატიის უკუსვლა საქართველოში" იქნება. რეზოლუციის პროექტში 5 პუნქტიდან 2 „რუსთავი 2“- ს ეთმობა.

"ევროპის სახალხო პარტია სერიოზულ შეშფოთებას გამოთქვამს იმ ცნობების გამო, რომ მიმდინარეობს მთავრობის მიერ მხარდაჭერილი კამპანია საქართველოს ყველაზე პოპულარული ტელეარხის - „რუსთავი 2“-ის მფლობელისა და სარედაქციო პოლიტიკის შესაცვლელად. ასევე ქვეყანაში მედიის თავისუფლების კუთხით არსებული ვითარების გამოც, იმის ჩათვლით, რომ საარჩევნო წელს პოლიტიკური ტოქშოუები დაიხურა. ევროპის სახალხო პარტია შეშფოთებას გამოთქვამს ოპოზიციის ლიდერთა პოლიტიკურად მოტივირებული გამოძიებების გაგრძელებისა და „რუსთავი 2“-ის მხარდამჭერთა წინასასამართლო დაკავების გამო. მოვუწოდებთ საქართველოს მთავრობას შეცვალოს ეს ტენდენციები და კონცენტრირება მოახდინოს ქვეყნის მომავალზე," - ნათქვამია განცხადებაში.

რეზოლუციის პროექტში ცალკე პუნქტი ეთმობა დედაქალაქის ყოფილი მერის, გიგი უგულავას ხელახალ დაკავებასაც.