სასამართლოში კიდევ ერთი ტელეკომპანიის საქმე მიდის

სასამართლოში კიდევ ერთი ტელეკომპანიის საქმე მიდის - გაჩეჩილაძე ლოგოს ითხოვს

პოლიტიკა - 16:32, 20 Oct, 2015

2466

გიორგი გაჩეჩილაძემ დღეს „მაესტროსთან“ დაკავშირებით სასამართლოში სარჩელი შეიტანა. გაჩეჩილაძე „მაესტროს“ გაკოტრების საქმის დაწყების განჩინებას ასაჩივრებს, ამასთანავე ითხოვს, რომ „მაესტროს“ ლოგოს გასხვისება ბათილად გამოცხადდეს და ის ტელეკომპანიას დაუბრუნდეს. ადვოკატის თქმით, მფოლობელმა პარტნიორებმა გადახდის-უუნარობის საქმის წარმოება ისე დაიწყეს სასამართლოში, რომ შეთავაზება, კომპანიის ფინანსური მდგომარეობის გაუმჯობესების შესახებ, არც განუხილავთ.

"ჩვენ დღეს შევიტანეთ სარჩელი და ვითხოვთ მაესტროში ლოგოს დაბრუნებას. მოთხოვნილი გვაქვს მაესტროში აუდიტის ჩატარება. აუდიტმა უნდა დაადგინოს, როგორ არის აღრიცხული გიორგი და ლევან გაჩეჩილაძეების მიერ მიტანილი 2 მილიონი აშშ დოლარის ოდენობის თანხა მაესტროში. ხომ არ არის ის გოგელიას ვალში აღრიცხული. ასევე უნდა დაადგინოს გოგელიას მიერ ინვესტირებული თანხები მაესტროში მხოლოდ მისია თუ მის უკან სხვა სპონსორების თანხებიცაა," - განაცხადა გიორგი გაჩეჩილაძის ადვოკატმა ირაკლი კორძაიამ.

22 ოქტომბერს ტელეკომპანია „მაესტროს“ 25%-იანი წილის მფლობელი გიორგი გაჩეჩილაძე საზოგადოებას ღია წერილით მიმართავს. ამასთან დაკავშირებით გაჩეჩილაძის ადვოკატმა ირაკლი კორძახიამ დღეს გამართულ პრესკონფერენციაზე ისაუბრა.

ღია წერილში საუბარი ტელეკომპანია „მაესტროს“ ირგვლივ განვითარებულ მოვლენებსა და სამართლებრივი დავის ასპექტებს შეეხება. ამასთან, ადვოკატის ინფორმაციით, გაჩეჩილაძე „მაესტროს“ მართვაში გადაცემის სანაცვლოდ მზადაა, პარტნიორებს 10 მლნ აშშ დოლარის საბანკო გარანტია წარუდგინოს.

„თუ გიორგი გაჩეჩილაძე თავის მიერ აღებულ ვალდებულებებსა და პირობებს ვერ შეასრულებს და „მაესტროს“ ვერ გახდის მომგებიანს, მათ შეეძლებათ, 10 მლნ აშშ დოლარი გარანტიის სახით, კომერციული ბანკიდან წამოიღონ. აბსოლუტურად არასწორი ინფორმაცია ვრცელდება, თითქოს გიორგი გაჩეჩილაძის უკან ვიღაც დგას. ის მხოლოდ „მაესტროს“ გადასარჩენად იბრძვის“, - განმარტა ირაკლი კორძახიამ.