"გაზის საკითხში ხელისუფლების კერძო ინტერესები ჩანს, კალაძის განცხადება ალოგიკურია"

პოლიტიკა - 16:17, 20 Oct, 2015

1366

ექსპერტი რომან გოცირიძე „გაზპრომთან“ დაკავშირებით ენერგეტიკის მინისტრის განცხადებებს ალოგიკურს უწოდებს.

გოცირიძის თქმით, წინა ხელისუფლება რუსულ გაზს ყიდულობდა მანამ, სანამ არ იყო სხვა ალტერნატივა.

როგორც ექსპერტი წერს, კალაძის განცხადებებიდან ჩანს, რომ გაზის საკითხში ხელისუფლების კერძო ინტერესები იკვეთება.

„ენერგეტიკის მინისტრმა ლოგიკასმოკლებული განცხადება გააკეთა:

1). გაზი არ გვყოფნის, აზერბაიჯანიდან ვერ შემოგვაქვს და "გაზპრომიდან" უნდა ვიყიდოთო, ანუ სხვა გზა არა გვაქვსო.

ანუ, აზერბაიჯანი ფეხებზე გვიკიდებს, იმ მცირეოდენ დამატებით გაზზეც კი უარს გვეუბნება, რომელიც 2018 წლამდე დაგვაკლდება. რატომ 2018წელი? იმიტომ, რომ მაშინ ამოქმედდება შაჰდენიზ-2 და ჩვენს ტერიტორიაზე გაივლის დამატებით 6 მილიარდი კუბური მეტრი გაზი, საიდანაც ჩვენც გვეკუთვნის წილი( ახლა 7 მილიარდი კუბური მეტრი გადის). 2019 წელს კი დამატებით გაივლის 10 მილიარდი კუბური მეტრი.

2). თვითონ აზერბაიჯანი ყიდულობს რუსეთიდან გაზსო.

რა გამოდის, აზერბაიჯანს არ ყოფნიდა და ჩვენ გვაძლევდა, თანაც იაფად? ლამაზი თვალებისათვის? ანუ სწორედ ამას ჰქვია გეოსტრატეგიული პარტნიორობა. აზერბაიჯანს ჩვენს გარეშე გზა არა აქვს თავის სიმდიდრის ტრანსპორტირების. ესე იგი, უღირს საქართველოს უსაფრთხოებაზე ზრუნვა თუნდაც გარკვეული დანაკარგების ფასად.

3). თუ რუსული გაზის ფასი არ მოგვეწონა, არ ვიყიდითო?

ეს კი მართლაც სასაცილოა. მაშინ რას იზამენ? ისევ აზერბაიჯანს მიმართავენ, რომელის ვალიკოს " Совсем не уважает"?, თუ გამორთავენ მომხმარებლებს?

4). წინა ხელისუფლებაც ყიდულობდა რუსეთიდანო.

რა არგუმენტია ეს. ყიდულობდა, მანამ სანამ არ იყო სხვა ალტერნატივა. ბაქო-თბილისი-ერზერუმის ამოქმედებიდან ნელ-ნელა მცირდებოდა რუსული გაზის წილი და იზრდებოდა აზერბაიჯანულის. როცა ეს სისტემა მთლიანად დაიტვირთა, რუსულ გაზსაც ხელი დავუქნიეთ.

დასკვნა: გაზის საკითხში ჩანს ხელისუფლების კერძო ინტერესები, პოლიტიკური ორიენტაცია და საგარეო პოზიციების დასუსტება( აზერბაიჯანის, თურქეთის, ევროპისა თუ ამერიკის მიმართულებით)“, - წერს გოცირიძე.