"არსებობს პოლიტიკური მორალის ზღვარი, რომელსაც არ უნდა გადააბიჯო"

"არსებობს პოლიტიკური მორალის ზღვარი, რომელსაც არ უნდა გადააბიჯო" - კალაძე "გაზპრომზე"

პოლიტიკა - 12:10, 20 Oct, 2015

1430

საქართველოს ენერგეტიკის მინისტრმა, ვიცეპრემიერმა კახა კალაძემ კომპანია „გაზპრომის“ თემაზე სპეციალური ბრიფინგი გამართა. კალაძის თქმით აღნიშნულ კომპანიასთან კომუნიკაცია და ხელშეკრულება უკვე წლებია არსებობს. ოპოზიციის მხრიდან აღნიშნული თემის წინ წამოწევას კალაძე მოახლოებულ არჩევნებს უკავშირებს და აცხადებს, რომ ოპოზიციური პარტიების ნაწილმა ამ თემაზე სპეკულირებით მორალურ ზღვარს გადააბიჯა:

„მაქსიმალურად გადავდეთ ჩვენი კომენტარი იმ არაჯანსაღ ეიფორიაზე, რაც ეს ბოლო დღეები ზოგიერთი პოლიტიკოსის თუ პოლიტიკური პარტიის მიერ იქნა ატეხილი გაზპრომთან გამართული სამუშაო შეხვედრის გამო. ხაზგასმით მინდა აღვნიშნო, რომ წლებია არსებობს კომუნიკაცია და ხელშეკრულება აღნიშნულ კომპანიასთან და ეს პირველ რიგში მათ იციან ვინც ეხლა ყველაზე ხმამაღლა ყვირის. გაზპრომთან დღეს მოქმედ ხელშეკრულებას 2003 წელს მოეწერა ხელი და მას შემდეგ 21 დამატება იქნა გაფორმებული ვადის გაგრძელებისა და სხვადასხვა ტექნიკური საკითხების დარეგულირების მიზნით. გაზპრომთან არსებული ხელშეკრულების ფარგლებში ყოველწლიური შეხვედრები იმართებოდა ეხლაც, სააკაშვილის რეჟიმის დროსაც და მანამდეც... გარდა ტრანზიტის საფასურად მიღებული გაზისა, ომის შემდგომაც კი ხდებოდა დამატებითი მოცულობების მიღება რუსეთიდან, მაგრამ რატომღაც ამ ფაქტებს ივიწყებენ. არსებობს პოლიტიკური მორალის რაღაც ზღვარი, რომელსაც თუნდაც ყველაზე მარგინალმა, ბანკროტმა პოლიტიკოსმა თუ პარტიამ არ უნდა გადააბიჯოს. გასაგებია, მოდის არჩევნების წელი და მავანი ყველაფერზეა წამსვლელი, რათა თავი შეახსენოს მოსახლეობას. დღეს რატომღაც ექსპერტების ნაწილი არ იხსენებს გაზპრომთან და მილსადენთან დაკავშირებულ ძალიან საინტერესო მოვლენებს, როცა ჩვენს მეგობრებს, ამერიკის შეერთებულ შტატებს მოუწია ჩარევა, რათა 2005 წელს მაშინდელი მთავრობის სურვილი სწორედ გაზპრომზე მიეყიდა მაგისტრალური გაზსადენი არ განხორციელებულიყო და ამის სანაცვლოთ ათობით მილიონი აშშ დოლარიც კი გამოუყო საქართველოს, იმის პირობით, რომ მთავრობა უარს იტყოდა ამ განზრახვაზე.... მაშინ, სააკაშვილს და მის გარემოცვას რომ თავისი ჩანაფიქრი განეხორციელებინათ, დღეს ჩვენ პოლიტიკური და ეკონომიკური ბერკეტის გარეშე ვიდგებოდით რუსეთის წინაშე და რეგიონში აუთსაიდერის როლით დავკმაყოფილდებოდით. აქ არის ფაქტები, დოკუმენტები, ციფრები და ყველას მოგიწოდებთ თავისი სახელი დავარქვათ ყველაფერს. ბოლო წლებში კი არა უკვე ბოლო თვეების დინამიკაში იცვლება რეგიონში მოვლენები, საქართველოს დომინანტი როლი, მომგებიანი გეოპოლიტიკური განლაგება და სამომავლო პერსპექტივები ნებისმიერი ჯანსაღად მოაზროვნე ადამიანისთვის ნათელია. ჩვენ ყველამ მაქსიმალური ძალისხმევა უნდა მივმართოთ იმისკენ, რომ ადამიანებს ჰქონდეთ განცდა - ისინი ცხოვრობენ პერსპექტიულ, განვითარების გზაზე მყოფ ქვეყანაში, რომელსაც საერთაშორისო ურთიერთობებში და პოლიტიკის წარმოებაში თავისი არცთუ უმნიშვნელო და ზოგ საკითხებში საკვანძო ადგილი აქვს. საქართველოს აქვს წონა და დანიშნულება მტრისთვისაც და მოყვარისთვისაც. და ამას გონივრულად უნდა მივუდგეთ. ამჯერად მაინც უნდა უარი ვთქვათ პოპულიზმზე, პარტიულ და პირად ანგარებაზე და შევხედოთ ქვეყნის მომავალს. ჩვენი ქვეყნის კეთილდღეობა და მისი ინტერესების დაცვა არის ჩვენი ხელისუფლების ვალდებულება, მიზანიც და მოტივაციაც, რათა დაცული იყოს საქართველოს თითოეული მოქალაქე, უზრუნველყოფილი იყოს ქვეყნის ენერგოუსაფრთხოება და ეკონომიკური განვითარება“- განაცხადა კახა კალაძემ.