ქიბარ ხალვაში მიხეილ სააკაშვილს დებატებში იწვევს

პოლიტიკა - 20:23, 19 Oct, 2015

3566

ბიზნესმენი ქიბარ ხალვაში "რუსთავი 2"-თან დაკავშირებით კიდევ ერთ განცხადებას ავრცელებს, რომლითაც საქართველოს მესამე პრეზიდენტს მიხეილ სააკაშვილს დებატებში იწვევს.
"მინდა ყველას გასაგონად და განსაკუთრებით, ყოფილი პრეზიდენტის გასაგონად განვაცხადო, რომ მის გეგმას განხორციელება არ უწერია.
უკვე დღესავით ნათელი ხდება, რომ სამართლებრივი დავის პოლიტიკურ სიბრტყეში გადატანის მცდელობა ემსახურება მხოლოდ და მხოლოდ ერთ მიზანს: „რუსთავი 2“–ის რეალური მეპატრონე, ყოფილი პრეზიდენტი მიშა სააკაშვილი გეგმავს „რუსთავი 2“-ის დახურვას დ ამ ფონზე პოლიტიკური დივიდენდების მიღებას „ნაციონალური მოძრაობისთვის“.
სააკაშვილის და ნაციონალური მოძრაობისთვის რეალურად სიტყვის თავისუფლება არანაირ ღირებულებას არ წარმოადგენს. კერძო საკუთრების ხელშეუხებლობა მათთვის რომ ცარიელი სიტყვებია, ეს ქართული საზოგადოებისთვის ახალი არ არის.
ვაცხადებ ღიად და საჯაროდ. – მიშა სააკაშვილს „რუსთავი 2“–ს არ დავახურინებ!
ყველა კანონიერ გზას მივმართავ და სამართლებრივი გზით ჩემი გამარჯვებისთანავე ვუზრუნველყოფ ტელეკომპანიის ფუნქციონირებას სწორედ სიტყვის თავისუფლების პრინციპის განუხრელი დაცვით!აქვე მინდა საზოგადოებას შევახსენო, რომ გასულ კვირას საჯარო განცხადებით ღია ეთერში დებატებში გამოვიწვიე „რუსთავი 2“–ის ნომინალური მფლობელები, ყარამანაშვილები.
როგორც მოსალოდნელი იყო, არავინ გამოგვხმაურებია. ეს ფაქტიც ცხადყოფს, რომ ყარამანაშვილები არიან ნომინალურად დანიშნული მეწილეებად და „რუსთავი 2“–ის რეალური პატრონი დღეს არის ოდესის გუბერნატორი მიშა სააკაშვილი.
მე დღის წესრიგიდან ვხსნი ყარამანაშვილებთან ტელე–დებატების საკითხს. მათ, ცხადია, არჩიეს არ გამოჩენილიყვნენ. სასაუბროდ ვიწვევ „რუსთავი 2“–ის რეალურ პატრონს, მიშა სააკაშვილს.
მიშა სააკაშვილი ვალდებულია ყველა კითხვას გასცეს პასუხი, რაც საზოგადოებას „რუსთავი 2“–ის წართმევა–ჩამორთმევის პერმანენტულ პროცესთან დაკავშირებით მის მიმართ გააჩნია.
ამ თემასთან დაკავშირებით მისი დუმილი მხოლოდ იმის დასტურია, რომ სათქმელი არაფერი აქვს. და თუ აქვს, კეთილი ინებოს და ჩემთან, მის მიერ ყოვლად უსამართლოდ დატერორებულ ადამიანთან, დაჯდეს პირდაპირ ეთერში.
კიდევ ერთხელ ვაცხადებ, – მიშას „რუსთავი 2“–ს არ დავახურინებ!
დარწმუნებული ვარ გამარჯვებაში, რადგან სიმართლე ერთია და ის ჩვენს მხარესაა. სამართლებრივი გზით ჩემი გამარჯვების და „რუსთავი 2“–ის დაბრუნების შემდეგ კი ეს ტელეკომპანია მართლაც გახდება თავისუფალი პარტიული ზეგავლენისგან და დაუბრუნდება სიტყვის თავისუფლების მსახურებას. ამუშავდება საზოგადოებრივი საბჭო, რომელიც უზრუნველყოფს ჟურნალისტური საქმიანობის სრულ დამოუკიდებლობას და თავისუფალ სარედაქციო პოლიტიკას", - ნათქვამია ქიბარ ხალვაშის განცხადებაში.