"ეს ლაქა დიდხანს გაგვყვება, მაგრამ ამ კადრების საჯარო ჩვენება პოლიტიკური ქულებისთვის სამარცხვინოა"

პოლიტიკა - 14:45, 19 Oct, 2015

2342

უმცირესობის ლიდერი დავით ბაქრაძე სამარცხვინოს უწოდებს ფაქტს, რომ წინა ხელისუფლების დროს არსებობდნენ ადამიანები, ვინც პატიმრებს აწამებდნენ.

ამის შესახებ ბაქრაძემ ორი დღის წინ გავრცელებული კადრების კომენტირებისას განაცხადა,

„მკაცრად ვამბობ, ის რომ ჩვენი ხელისუფლების დროს ძალოვან სტრუქტურებში მუშაობდნენ ასეთი ადამიანები, ეს არის მძიმე და სამარცხვინო ლაქა, რომელიც დიდხანს გაგვყვება, წინა ხელისუფლების ნაწილს. ვინც ამ საშინელებაში მონაწილეობდა, ვინც ამ კადრებს იღებდა, ვინც ამას უკვეთავდა ყველა ასეთი ადამიანი უმკაცრესად უნდა იყოს დასჯილი. კიდევ ერთხელ ვიმეორებ, არ მრცხვენია შეფასებების, ეს არის უმძიმესი ლაქა, რომ ჩვენი ხელისუფლებისთვის, რომელმაც ამდენი გააკეთა ქვეყნის ფეხზე დასაყენებლად“, - აღნიშნა ბაქრაძემ.

უმცირესობის ლიდერი საგანგაშოს უწოდებს ფაქტს, რომ წამების ამსახველი კადრების საჯაროდ ჩვენება მოხდა.

„ხელისუფლებაში დიდი რაოდენობით არიან ის ადამიანები, ვისაც მიჩნიათ, რომ ასეთი კადრები უნდა გაუშვას ქუჩაში. გუშინ ვიხილეთ ზუგდიდში საჯაროდ გაშვებული ეს კადრები, რომელსაც ესწრებოდნენ მაღალი რანგის სახელსუფლებო წარმომადგენლები. ერთი უბდურებაა, რომ ასეთი რამ 7 წლის წინ მოხდა, მაგრამ მასზე დიდი უბედურებაა რომ ვიქეცით საზოგადოებად, სადაც ასეთი რაღაცეები პოლიტიკური ბრძოლის ნაწილად გამოიყენება. დღეს ასეთი ხელისუფლება გვყავს. საჯაროდ მოქალაქეებს აყურებინებენ ამ სიბინძურეს, რომ პოლიტიკური ქულები მიიღოს. ეს ნიშნავს, რომ ქართული საზოგადოება შედის უზნეობის და უკანონობის ცუდ სპირალში. იმედია საზოგადოების რეაქცია იქნება იმდენად მკაცრი, რომ არც ამ მთავრობას და არც მომავალს არასდროს თავში არ მოუვა ასეთი სიბინძურე პოლიტიკური ინტერესებისთვის გამოიყენოს“, - განაცხადა ბაქრაძემ.