ტელეკომპანია ”რუსთავი 2” თან დაკავშირებით ”ნაციონალური მოძრაობის” განცხადების საპარლამენტო განხილვას არასაპარლამენტო ოპოზიცია ეხმაურება.

”ევროპელი დემოკრატების” ლიდერის პაატა დავითაიას შეფასებით, ორდღიანი დებატების დროს ხელისუფლებამ თავისი თავი გასცა და აჩვენა, რომ რუსთავი ორის წინააღმდეგ მართლაც ხელისუფლება იბრძვის.

”იმდენად ერთნაირია ხელისუფლების ქმედება, რომ მე მრჩება შთაბეჭდილება, რომ არის ერთიანი მესიჯბოქსები, არ შეიძლება ე.წ ”სამოქალაქო დავასთან” დაკავშირებით ყველას ერთიანი აზრი ქონდეს უმრავლესობაში.

”ახალი მემარჯვენეების” ერთ-ერთი ლიდერის მანანა ნაჭყებიას განცხადებით არ აქვს მნიშვნელობა ბრძოლის ობიექტი ”რუსთავი2”-ია, თუ თავის დროზე ”იმედი” იყო, მედიაზე ზეწოლა ერთმნიშვნელოვნად უარყოფითად უნდა შეფასდეს:

”როცა არის თავისუფალი მედიის წინააღმდეგ ბრძოლა, არანაირი მნიშვნელობა არა აქვს ამ ბრძოლის ობიექტი იყო თავის დროზე ”იმედი” თუ დღეს იქნება ”რუსთავი 2”, ამ თვალსაზრისით შეფასება აკლდა საპარლამენტო განხილვებს”- განაცხადა მანანა ნაჭყებიამ.

”ეროვნული დემოკრატიული პარტიის” ლიდერის ბაჩუკი ქარდავას განცხადებით, როდესაც ხელისუფლება ”რუსთავი 2” თან დაკავშირებით სასამართლოს ქნედებებზე საუბრობს, სასამართლოში თავისთავს მოიაზრებს

”ვამბობთ სასამართლოს, მაგრამ ვხურავთ ჩვენ - ხელისუფლება. ხელისუფლებას შეგნებულად უნდა საქართველო დააყენოს იმ ქვეყნების რიგში, რომელთაც მსოფლიოში არავინ არ ესაუბრება”- აღნიშნა ბაჩუკი ქარდავამ.

”ლეიბორისტი” გიორგი გუგავას შეფასებით ხელისუფლებას რუსთავი ორის ეშინია:

”რუსთავი2”-ის შესახებ საპარლამენტო განხილვებმა კიდევ ერთხელ ცხადყო, რომ ხელისუფლებას ”რუსთავი2”-ის ისე ეშინია, როგორც დამნაშავეს მართლმსაჯულების. ამას შეაჩერებს აუცილებლად საზოგადოება, რომელიც ფხიზლად უნდა იყოს და საჭიროების შემთხვევაში ფეხზეც უნდა დადგეს”- განაცხადა გიორგი გუგავამ.