თბილისის მერი დავით ნარმანია ლუბლიანის ვიცე-მერს შეხვდა

პოლიტიკა - 19:15, 16 Oct, 2015

779

თბილისის მერი დავით ნარმანია, ლუბლიანის ვიცე-მერს, დეიან კრნეკს შეხვდა. სტუმრები ლუბლიანიდან დავით ნარმანიას მოწვევით იმყოფებიან. ისინი „თბილისობის“ დღესასწაულს დაესწრებიან და დაგეგმილ ღონისძიებებში მიიღებენ მონაწილეობას.

თბილისის მერთან შეხვედრაზე სხვადასხვა საკითხებზე გამახვილდა ყურადღება. იმსჯელეს ორ დაძმობილებულ ქალაქს შორის ურთიერთობაზე, ასევე ტრანსპორტის განვითარებასა და სპორტულ ინფრასტრუქტურასთან დაკავშირებულ საკითხებზე.

„ლუბლიანაში ჩემი ვიზიტის დროს, ჩვენთვის ყველაზე საინტერესო ელექტრო მუნიციპალური ტრანსპორტი აღმოჩნდა, ისევე როგორც ენერგო ეფექტური შენობები და თანამედროვე მზის ბატარეები, რომლებიც გამოიყენება შენობების გასათბობად. სწორედ ამ პროექტებზე გავამახვილეთ ყურადღება. ისინი მოგვაწვდიან მეტ ინფორმაციას თავიანთი გამოცდილების შესახებ, რაზეც ჩვენი საელჩოც აქტიურადაა ჩართული. საელჩოს მეშვეობით გვექნება მეტი დეტალური ინფორმაცია აღნიშნულ თემებზე და შესაბამისად, ჩვენი სტრატეგიის დოკუმენტების მომზადებისა და კონკრეტული პროექტების განხორციელების პროცესში გამოვიყენებთ მათ“,- განაცხადა თბილისის მერმა დავით ნარმანიამ.

„ვისაუბრეთ სხვადასხვა საკითხებზე, მიმოვიხილეთ თბილისში არსებულ ახალ ინფრასტრუქტურულ ობიექტებთან დაკავშირებული თემები, ვისაუბრეთ სპორტულ ინფრასტრუქტურაზეც. განვიხილეთ ტრანსპორტის განვითარებასთან დაკავშირებული საკითხები. ჩვენ ქალაქში ელექტრო სატრანსპორტო საშუალებები გვაქვს. სწორედ აღნიშნულ საკითხზე უკვე შევხვდით საქართველოს ელჩს და ელექტრო ავტოსატრანსპორტო საშუალებებზე დეტალური ინფორმაცია მივაწოდეთ“,- განაცხადა ლუბლიანის ვიცე-მერმა დეიან კრნეკმა.