ქიბარ ხალვაში ნიკა გვარამიას საქმიანობის კანონიერების შესწავლას აპირებს

პოლიტიკა - 12:17, 16 Oct, 2015

1472

„რუსთავი 2“-ისთვის მოდავე ბიზნესმენი ქიბარ ხალვაში, გაზეთ „ვერსიასთან“ ინტერვიუში, ნიკა გვარამიას სიცრუის გავრცელებაში ადანაშაულებს. ხალვაში უარყოფს გავრცელებულ ინფორმაციას იმის შესახებ, რომ რუსთავი ორის შესაძენი ფული მას ოქრუაშვილმა მისცა. ამასთანავე ხალვაშს იმედი აქვს რომ ის ტელეკომპანიას დაიბრუნებს და ნიკა გვარამიას, როგორც კომპანიის დირექტორის საქმიანობის შესწავლას აპირებს:

"დღესაც ცდილობენ, ჩემი სახელი დააკავშირონ ოქრუაშვილთან და კვლავაც აგრძელებენ აბსურდული ისტორიების მოყოლას, რომ თითქოს, მე ოქრუაშვილმა მომცა „რუსთავი 2“-ის შესაძენი ფული, თუ კომპენსაცია გადამიხადა. ურთიერთსაწინააღმდეგო რამეებს ამბობენ ნახევარსაათიან ინტერვალში. სრული პასუხისმგებლობით ვაცხადებთ, ეს არის გვარამიას მიერ უნიჭოდ შეთხზული კიდევ ერთი ყალბი ისტორია, რომელსაც სინამდვილესთან არანაირი კავშირი არა აქვს. თუმცა მე გვარამიასთან ჯერჯერობით სალაპარაკო არაფერი მაქვს. როგორც იცით, ტელედებატებში გამოვიწვიე „რუსთავი 2“-ის ნომინალური მფლობელები _ ყარამანაშვილები და დღემდე პასუხი არ მიმიღია. რაც შეეხება გვარამიას, მისი, როგორც კომპანიის დირექტორის საქმიანობის კანონიერების შესწავლას აუცილებლად მოვითხოვ, როდესაც დავიბრუნებ ტელეკომპანიას"- აცხადებს ქიბარ ხალვაში.