აბრეშუმის გზის ფორუმში შეიხი ნაჰაიან მაბარაქ ალ ნაჰაიანიც მიიღებს მონაწილეობას

პოლიტიკა - 10:15, 15 Oct, 2015

2675

აბრეშუმის გზის ფორუმში მონაწილეობის მისაღებად, საქართველოში არაბეთის გაერთიანებული საამიროების შეიხი, მისი აღმატებულება ნაჰაიან მაბარაქ ალ ნაჰაიანი ჩამოდის.

„შეიხი ნაჰაიანი 15 ოქტომბერს მონაწილეობას მიიღებს აბრეშუმის გზის ფორუმის საზეიმო გახსნაში და მონაწილეებს მისასალმებელი სიტყვით მიმართავს. ამავე დღეს, 14.30 საათზე, შეიხი ნაჰაიანი „ქეი-ეს-ბი ბანკის“ სათავო ოფისში (ქეთევან წამებულის გამზირი N 3) მივა და ბანკში მიმდინარე პროცესებსა და სამომავლო გეგმებთან დაკავშირებით მენეჯმენტის ანგარიშს მოისმენს. შეიხი „ქეი-ეს-ბი ბანკის“ აქციათა 45 %-ის მფლობელია.

მისი აღმატებულება ნაჰაიან მაბარაქ ალ ნაჰაიანი არაბეთის საამიროების კულტურის, ახალგაზრდობისა და საზოგადოებრივი განვითარების მინისტრი, აბუ-დაბის გაერთიანებული ეროვნული ბანკის თავმჯდომარე და ალ აინის უნივერსიტეტის რექტორია. შეიხი მრავალი ეროვნული და საერთაშორისო პრემიისა და ჯილდოს მფლობელია, ის თავმჯდომარეობს და პატრონაჟს უწევს 100-ზე მეტ ყოველწლიურ კონფერენციასა და სიმპოზიუმს, რომლებიც არაბთა გაერთიანებულ საემიროებში, რეგიონსა და მთლიანად მსოფლიოში აქტუალურ საკითხებს ეძღვნება“, - აცხადებენ ეკონომიკის სამინისტროში.

შეიხის მფლობელობაშია უმსხვილესი არაბული საინვესტიციო კომპანია „დაბი ჯგუფი,“ რომელიც საქართველოში „ქეი-ეს-ბი ბანკსა“ და სასტუმრო „მილენიუმს“ უწევს მეთვალყურეობას.

საქართველოს პრემიერ-მინისტრის პატრონაჟით 2015 წლის 15-16 ოქტომბერს თბილისში პირველად ტარდება „თბილისის აბრეშუმის გზის ფორუმი“. მასშტაბური საერთაშორისო ღონისძიების ორგანიზატორია საქართველოს მთავრობა, თანაორგანიზატორი - ჩინეთის სახალხო რესპუბლიკის მთავრობა. ქართული მხრიდან ფორუმის საორგანიზაციო საკითხებს წარმართავენ საქართველოს ეკონომიკისა და მდგრადი განვითარების და საგარეო საქმეთა სამინისტროები.