"მნიშვნელოვანია დავრჩეთ ნეიტრალურები" - მინისტრები ჰააგის პროკურატურის განცხადებაზე

პოლიტიკა - 15:08, 14 Oct, 2015

986

ჯანდაცვის მინისტრი დავით სერგეენკო მიიჩნევს, რომ ჰააგის პროკურატურას ქართულმა მხარემ მის ხელთ არსებული ყველა მონაცემი უნდა მიაწოდოს.

სერგეენკოს თქმით, საერთაშორისო სასამართლოს პროკურორებს უნდა მიეცეთ საშუალება, რომ აგვისტოს ომთან დაკავშირებით დასკვნა ობიექტურად გამოიტანონ.

"როგორც ვიცი, ჰააგის სასამართლო პოტენციურად სამხედრო დანაშაულის გამოძიებისკენ არის მოწოდებული. მე არ მინახავს წარმოებაში მიღებული საქმე, თუმცა ვფიქრობ, რომ სასამართლოს მუშაობის პროცესში არ უნდა ჩავერიოთ და თუკი ეს საქმე აღიძრა მათ მიეწოდებათ ყველა ის მონაცემი, რომელიც მათ საშუალებას მისცემს ობიექტურად გამოიტანონ დასკვნა", - განაცხადა დავით სერგეენკომ.

სამართლის საერთაშორისო სასამართლოს პროკურორის განცხადებას განათლების მინისტრიც გამოეხმაურა.

"ძალიან მაღალ ინსტანციაზე სასამართლოზე ვსაუბრობთ და ძალიან მნიშვნელოვანია დავრჩეთ ნეიტრალურები. ჩვენი თანამონაწილეობა უნდა იყოს ლოგიკურად ხელშეწყობა ყველა იმ ინფორმაციის მიწოდებით, რაც საჭიროა, რომ შესაბამისი განაჩენი იქნას გამოტანილი", - განაცხადა სანიკიძემ.

სისხლის სამართლის საერთაშორისო სასამართლოს პროკურორმა, ფატუ ბენსუდამ თხოვნით მიმართა მოსამართლეებს, ნება დართონ პროკურორის ოფისს დაიწყოს გამოძიება 2008 წელს საქართველოში შეიარაღებული კონფლიქტის დროს ომის და ადამიანურობის წინააღმდეგ ჩადენილი დანაშაულების ფაქტებზე. ამ მიზნით პროკურორმა ითხოვა საქართველოში 2008 წლის 1ივლისიდან ამავე წლის 10 ოქტომბრამდე არსებული სიტუაციის გამოძიება. პროკურორის ოფისის განცხადებას ჰააგის სასამართლოს ვებგვერდი ავრცელებს.