საქართველოს ენერგოუსაფრთხოებისა და ენერგომატარებლების ტრანზიტის სფეროში არსებული მდგომარეობიასთან დაკავშირებით მთავრობის სხდომის მოწვევის შესახებ პრეზიდენტის წინადადებას მთავრობის წევრები არ ეთანხმებიან. მინისტრთა კაბინეტის წევრები პრეზიდენტთან შეხვედრისა და მთავრობის სხდომის მოწვევის აუცილებლობას ვერ ხედავენ და მზად არიან გიორგი მარგველაშვილს ენერგოუსაფრთხოებაზე ინფორმაცია წერილობით მიაწოდონ.

ენერგეტიკის მინისტრი მზადაა პრეზიდენტთან შესახვედრად მოადგილე ან ენერგეტიკული დეპარტამენტის ხელმძღვანელი გააგზავნოს, რომელიც გიორგი მარგველაშვილს დეტალურ ინფორმაციას მიაწვდის.

„რატომ დგება ენერგოუსაფრთხოების თვალსაზრისით საკითხები, არ მესმის. ამ მხრივ არანაირი პრობლემა არ არსებობს. თუ ვინმეს, კონკრეტულ პიროვნებებსა თუ დაჯგუფებებს სურთ პოპულისტური განცხადებების კეთება, ეს მათი ნებაა. თუ პრეზიდენტს აქვს ინტერესი, მე მზად ვარ, გამოვყო ჩემი მოადგილე ან ენერგეტიკული დეპარტამენტის ხელმძღვანელი და ადმინისტრაციას მიაწოდოს დეტალური ინფორმაცია დღევანდელი ვითარების შესახებ,“ - აცხადებს კახა კალაძე.

ინფრასტრუქტურის მინისტრის თქმით, მისთვის უცნობია რა საფრთხეებს ხედავს პრეზიდენტი ენერგეტიკის თვალსაზრისით:

„არ ვიცი პრეზიდენტს რა ინფორმაცია აქვს, რა საშიშროება გვაქვს, ჩვენ ენერგეტიკის თვალსაზრისით, თუ რამე ისეთი ინფორმაცია აქვს, რასაკვირველია შეიძლება განვიხილოთ, თუ აინტერესებს დღეს შექმნილი ვითარება ალბათ მთავრობა მზად იქნება, რომ გაუგზავნოს მას ინფორმაცია.“- განაცხადა ნოდარ ჯავახიშვილმა.

შეგახსენებთ, პრეზიდენტის ადმინისტრაციამ გაავრცელა ინფორმაცია, რომლის თანახმადაც საქართველოს პრეზიდენტი გიორგი მარგველაშვილი მთავრობის სხდომაზე დასწრებას და "საქართველოს ენერგოუსაფრთხოებისა და ენერგომატარებლების ტრანზიტის სფეროში არსებული მდგომარეობის" განხილვას ითხოვს.