თბილისში დღეს აბრეშუმის გზის ფორუმი იხსნება.

დედაქალაქს სხვადასხვა ქვეყნიდან დელეგატები უკვე ეწვივნენ. ფორუმის მონაწილეებს რუსთაველის თეატრში უმასპინძლებენ.

აბრეშუმის გზის ფორუმს პრემიერ-მინისტრი გახსნის. მთავრობის წარმომადგენლები ვარაუდობენ, რომ ფორუმი საქართველოში ბიზნესის განვითარებას და სამუშაო ადგილების შექმნას შეუწყობს ხელს.

ირაკლი ღარიბაშვილმა ფორუმის დაარსების ინიციატივა გასულ წელს, გაერო-ს გენერალურ ასამბლეაზე სიტყვით გამოსვლისას გააჟღერა. აბრეშუმის გზის აღდგენა ჩინეთის პრეზიდენტის ინიციატივაა, რომელსაც საქართველო გამოეხმაურა.

ფორუმს 30-ზე მეტი ქვეყნის 1000-ზე მეტი წარმომადგენელი ესწრება, მათ შორის 300-მდე მსხვილი ჩინური კომპანიის ხელმძღვანელი პირები და ჩინეთის მთავრობის წარმომადგენლები.