ედპ: ,,გაზპრომთან“ გარიგებით მთავრობა რუსეთს საქართველოზე ზეწოლის კიდევ ერთ ბერკეტს აძლევს

პოლიტიკა - 20:00, 12 Oct, 2015

800

ეროვნულ-დემოკრატიული პარტია რუსულ ,,გაზპრომსა“ და საქართველოს მთავრობას შორის გარიგებას ეხმაურება და ოკუპანტ ქვეყანასთან ეკონომიკაში მსგავსი ტიპის ,,ღია კარის პოლიტიკას“ სახელმწიფოსათვის სახიფათოდ მიიჩნევს. ამის შესახებ ედპ-ს მიერ გავრცელებულ განცხადებაშია აღნიშნული, რომელსაც ,,ნიუპოსტი“ უცვლელად გთავაზობთ:

,,ეროვნულ-დემოკრატიული პარტია საქართველოს მთავრობასა და „გაზპრომს“ შორის გარიგებას აფასებს როგორც ქართული სახელმწიფოსთვის ზიანის მომტანს, რადგან მიაჩნია, რომ რუსეთთან, ოკუპანტ ქვეყანასთან, ეკონომიკაში „ღია კარის პოლიტიკა“ ქვეყნის დამოუკიდებლობისათვის სერიოზული საფრთხის შემცველია.

მთელი ცივილიზებული პოლიტიკური სამყარო, სამწუხაროდ, ჩვენი ხელისუფლების გამოკლებით, შეთანხმებულია, რომ რუსეთისთვის ეკონომიკა და განსაკუთრებით ენერგეტიკა, არის საკუთარი აგრესიული პოლიტიკის გატარების საშუალება.

იმ დროს, როდესაც ევროპა მაქსიმალურად ცდილობს თავი დააღწიოს რუსული გაზზე დამოკიდებულებას, რისი შედეგიც სამხრეთის ენერგეტიკული დერეფანია, რომლის ნაწილიც საქართველოა, იმ დროს, როდესაც „გაზპრომს“ სანქციებს უწესებს ამერიკის შეერთებული შტატები, სრულიად გაუგებარი და არაადექვატურია მთავრობის პოლიტიკა. რატომ ცდილობს საქართველოს ხელისუფლება კიდევ ერთი ბერკეტი მისცეს ოკუპანტს საქართველოზე პოლიტიკური ზეწოლის განსახორციელებლად.

რადგან რუსული „გაზპრომი“, კრემლის პოლიტიკური იარაღია და სწორედ რუსეთის მხრიდან გაზის მოწოდების შეწყვეტამ დააყენა საქართველო ენერგეტიკული კოლაფსის ზღვარზე, ყოვლად უსუსურია ხელისუფლების არგუმენტები ამ გარიგების ეკონომიკური სარგებელის თაობაზე.

საქართველო არც დღეს დგას და არც მომავალში დადგება ბუნებრივი აირით მომარაგების პრობლემის წინაშე, რადგან ჯერ ერთი აზერბაიჯანი, ჩვენი სტრატეგიული პარტნიორი, შეუფერხებლად გვაწვდის მას, და მეორეც საქართველო არის ნაწილი ევროპის ენერგო უსაფრთხოების სისტემის, საქართველოზე გამავალი მილსადენის სახით და პერსპექტივაში მოხდება აღნიშნული სატრანსპორტო დერეფნის განვითარება, რაც ჩვენი ქვეყნისთვის დამატებითი და იაფი ენერგიის მიღების წყარო იქნება.

ამიტომ ხელისუფლების ამგვარი ქცევა, საფუძვლიან ეჭვს ბადებს ჩვენი ქვეყნის საგარეო-პოლიტიკურ ორიენტირზე და ასევე ჩნდება ეჭვი, ხომ არ დგას ამ მოლაპარაკებების უკან დღევანდელი ხელისუფლების წარმომადგენლების კომერციული ინტერესი“ - ნათქვამია პარტიის განცხადებაში.