"ლოგიკურია" - ზაქარია ქუცნაშვილი NDI- ის შედეგებზე

პოლიტიკა - 12:19, 12 Oct, 2015

1336

საპარლამენტო უმრავლესობის წევრი ზაქარია ქუცნაშვილი ეროვნულ–დემოკრატიული ინსტიტუტის (NDI) მიერ წარმოდგენილი უახლესი კვლევის შედეგებს, რომლის მიხედვითაც, ბოლო ერთი წლის მანძილზე, საქართველოს მოსახლეობის 47%-თვის ცხოვრების დონე არ შეცვლილა, 43%–თვის კი გაუარესდა, ლოგიკურს უწოდებს.

"ნიუპოსტთან" საუბრისას "ქართული ოცნების" წევრმა მოსახლეობის განწყობა ლარის დევალვაციას დაუკავშირა.

"გლობალური ეკონომიკური მდგომარეობის ფონზე, ლარის დევალვაცია მოსახლეობის განწყობაზე აისახა. მათ ცხოვრება გაუძვირდათ, შესაბამისად თუ ცხოვრება ძვირდება მოსახლეობის უკმაყოფილება იზრდება" - აღნიშნა დეპუტატმა.

ზაქარია ქუცნაშვილი თვლის რომ ქართული ოცნების მთავარ გამოწვევად დასაქმება რჩება.

ცნობისთვის, NDI-ის გამოკითხულთა 66 % თავს დაუსაქმებლად მიიჩნევს.

NDI-ის კვლევის საველე სამუშაოები მიმდინარე წლის 8 აგვისტო-10 სექტემბრის პერიოდში, საქართველოს მასშტაბით 4,448 პირისპირ ინტერვიუს წარმომადგენობითი შერჩევის საფუძველზე, ქვეყნის მოსახლეობას შორის ჩატარდა. კვლევაში საშუალო ცდომილების ზღვარი არის +/- 3.01%. NDI-ის კვლევებს აფინანსებს შვედეთის საერთაშორისო თანამშრომლობის განვითარების სააგენტო (Sida) და ატარებს CRRC–საქართველო.