„გაზპრომი და სოკარი საქართველოსთვის გაზის ომს იწყებენ“- აზერბაიჯანული მედია

პოლიტიკა - 15:29, 09 Oct, 2015

2852

საქართველოში რუსული გაზის რესურსის გაზრდის შესახებ ვიცე პრემიერ კახა კალაძის განცხადებას აზერბაიჯანული მედია ეხმაურება. ამ თემასთან დაკავშირებით აზერბაიჯანული საინფორმაციო სააგენტო haqqin.az-ი სტატიას აქვეყნებს სათაურით: „გაზპრომი და სოკარი საქართველოსთვის გაზის ომს იწყებენ“.

სტატიაში მიმოხილულია ის პირობები, რა პირობებითაც საქართველო აზერბაიჯანიდან გაზს იღებს. გამოცემა საქსტატზე დაყრდნობით წერს, რომ აზერბაიჯანული გაზის ფასი საქართველოსთვის იმაზე ნაკლებია, ვიდრე ის შეღავათიანი ფასი, რომელსაც რუსეთს სომხეთი გაზის მიწოდებისთვის უხდის.

„ენერგეტიკის მინისტრის განცხადება ფაქტიურად საქართველოს გაზის ბაზრისთვის „გაზპრომსა“ და „სოკარს“ შორის ახალი ბრძოლის დაწყებას ნიშნავს. აღსანიშნავია, რომ საქართველოს ბუნებრივი აირის ბაზრის 90% სოკარს უკავია, როგორც ჩანს საქართველოს ხელისუფლებამ გადაწყვიტა, წერტილი დაუსვას აზერბაიჯანის მონოპოლიას გაზის სფეროში“- აღნიშნავს გამოცემა.

haqqin.az-ი ასევე ხაზს უსვამს იმ ფაქტსაც, რომ „გაზპრომის“ ერთერთი მსხვილი კერძო აქციონერი საქართველოს ყოფილი პრემიერ-მინისტრია. ბიძინა ივანიშვილი „გაზპრომის“ აქციების 1 %-ს აკონტროლებს.

შეგახსენებთ, კახა კალაძესა და “გაზპრომის” მმართველ ალექსეი მილერს შორის შეხვედრა პარასკევს, 25 სექტემბერს შედგა. როგორც “გაზპრომის” ოფიციალურ საიტზეა განცხადებული, შეხვედრა ბრიუსელში გაიმართა და ეს იყო სამუშაო შეხვედრა, რომელზეც საქართველოსთვის რუსული ბუნებრივი აირის მიწოდებისა და ასევე საქართველოს გავლით მისი მესამე ქვეყანაში ტრანზიტის საკითხები განიხილეს.

ვრცელდება ინფორმაცია, რომ „გაზპრომის“ და კახი კალაძის შეხვედრა უახლოეს პერიოდში ისევ გაიმართება. როგორ ენერგეტიკის მინისტრის მოადგილე ილია ელოშვილი ამბობს, ის მიესალმება თუ "გაზპრომიდან" საქართველოს კომერციულად გამართლებული შემოთავაზება ექნება