ჰააგის სასამართლოს მიერ აგვისტოს ომის შესაძლო გამოძიების ფაქტს უმრავლესობის წევრი ეკა ბესელია ეხმაურება.

მისი თქმით, ხელისუფლების ამოცანაა, რომ რუსეთის მხრიდან საქართველოს მოქალაქეების უფლებების დარღვევის ფაქტები დადგინდეს.

„საქართველოს მხარეს ჰქონდა კომუნიკაცია და მთელი ეს პერიოდი რამდენჯერმე იყო შეხვედრა, მათ შორის იყო პროკურორი ჩამოსული ჰააგის სასამართლოდან. საქართველოში ეს წინა წლებშიც ხდებოდა და ბოლო პერიოდშიც ხდება. ჩვენი ინტერესია, დადგინდეს ჩვენი მოქალაქეების უფლებების დარღვევის ფაქტები ჩრდილოელი მეზობლის მხრიდან, რადგან შეილახა ჩვენი მოქალაქეების უფლებები და ჩვენი ტერიტორიული მთლიანობა. მეორე მხარესაც აქვს თავისი პოზიცია, ამიტომ ჩვენი ამოცანაა, რომ ჩვენი ქვეყნის და მოქალაქეების ინტერესები დაცული იყოს“, - განაცხადა ბესელიამ.

რუსეთ-საქართველოს 2008 წლის აგვისტოს ომი შესაძლოა, ჰააგის სისხლის სამართლის საერთაშორისო სასამართლომ გამოიძიოს. როგორც სასამართლოს ოფიციალურ ვებგვერდზე გამოქვეყნებულ განცხადებაშია ნათქვამი, საქართველოში ვითარების წინასწარი შესწავლა 2008 წლის აგვისტოში დაიწყო.