იუსტიციის მინისტრი პრობლემას ვერ ხედავს იმაში, რომ საქართველოში სასამართლოს მუშაობის გასაცნობად ევროკავშირის დელეგაცია ჩამოვიდეს.

როგორც თეა წულუკიანმა განაცხადა, ხელისუფლება მზადაა ევროკავშირის დელეგაციას სასამართლოს მუშაობასთან დაკავშირებით ყველა კითხვაზე ამომწურავი პასუხი გასცეს.

„თუ წინა ხელისუფლების დროს საამართლოში ცხვირს ვერავინ შეყოფდა, ჩვენი რეფორმის წყალობით ყველას შეუძლია არა მხოლოდ შევიდეს სასამართლო დარბაზში და დაესწროს სხდომას, არამედ ჩვენ შევიყვანეთ პროცესებზე მედია და კამერები. ამიტომ ვერანაირ პრობლემას ვერ ვხედავ. ვისაც უნდა ჩამოვიდეს და სასამართლო პროცესების დამსწრე გახდეს“, - განაცხადა წულუკიანმა.

სასამართლო მუშაობის გასაცნობად ევროკავშირის დელეგაციის საქართველოში შესაძლო ჩამოსვლასთან დაკავშირებით განცხადება საქართველოს საგარეო საქმეთა მინისტრმა გიორგი კვირიკაშვილმა განაცხადა.

მინისტრის თქმით, საქართველო მზად არის იმ საკითხებზე, რომელთა მიმართებაშიც ევროპელი პარტნიორების მხრიდან არსებობს ინტერესი შეიქმნას გარკვეული მექანიზმი, რაც საშუალებას მისცემს ევროპელ პარტნიორებს მიიღონ ამომწურავი პასუხი ყველა კითხვაზე.