კვირიკაშვილმა იოჰანეს ჰანთან ევროკავშირთან თავისუფალი სავაჭრო სივრცის შეთანხმებაც განიხილა

პოლიტიკა - 21:10, 08 Oct, 2015

1125

საქართველოს ვიცე პრემიერის, საგარეო საქმეთა მინისტრის გიორგი კვირიკაშვილის განცხადებით, გაფართოებისა და ევროპული პოლიტიკის საკითხებში ევროკომისართან იოჰანეს ჰანთან შეხვედრის დროს ერთ-ერთ საკითხად განხილული იყო ევროკავშირთან თავისუფალი სავაჭრო სივრცის შეთანხმება და მისი მნიშვნელობა საქართველო-ევროკავშირის ურთიერთობაში.

კერძოდ ხაზი გაესვა იმ განსაკუთრებულ შესაძლებლობებს, რასაც DCFTA-ის გამოყენება აძლევს საქართველოსა და ევროპელ პარტნიორებს.

“ევროკომისართან ვისაუბრეთ თავისუფალი სავაჭრო სივრცის შეთანხმების სერიოზულ პოტენციალზე, რომლიც საქართველოს აქცევს ევროპის მნიშვნელოვან პარტნიორად აღმოსავლეთ ქვეყნებთან ურთიერთობის კუთხით. ის, შესაძლებლობები, რასაცDCFTA უქმნის საქართველოს აღმოსავლეთ ქვეყნებიდან ინვესტიციების მოზიდვის კუთხით არის ძალზედ მნიშვნელოვანი. ეს ასევე სერიოზული პლატფორმაა ევროპული ქვეყნებისთვის აწარმოონ ურთიერთობა ამ რეგიონთან. მნიშვნელოვანია ის, რომ საქართველო ასრულებდეს კარიბჭის როლს ევროპისა და შორეული აღმოსავლეთისთვის. DCFTA-ს მოაქვს შესანიშნავი შესაძლებლობები როგორც უშუალო სამეზობლოს, ისე შორეული აღმოსავლეთის ქვეყნებისთვის, ისეთ სფეროებში, როგორიცაა მრეწველობა, ლოგისტიკა, ტრანსპორტი. ჩვენ ყველაფერს გავაკეთებთ იმისათვის, რომ სრულად გამოვიყენოთ ეს პოტენციალი მომავალში. მნიშვნელოვანია, რომ DCFTA უკვე შედის იმ ფაზაში, როდესაც ეს კონკრეტული შედეგების სახით გამოჩნდება”- განაცხადა გიორგი კვირიკაშვილმა.

იოჰანეს ჰანთან გამართულ ერთობლივ პრესკონფერენციაზე მინისტრმა ასევე ისაუბრა თავისუფალი სავაჭრო სივრცის შეთანხმების ფარგლებში გატარებული რეფორმების წარმატებაზე. მისი თქმით, ამას მოწმობს საქართველოს კერძო სექტორში მიღწეული რეალური შედეგები, კერძოდ ევროკავშირთან ვაჭრობის ზრდის ტენდენცია და ევროკავშირის წილი საქართველოს სავაჭრო ბრუნვაში, რომელიც დაახლოებით 30 პროცენტს შეადგენს. გიორგი კვირიკაშვილის განცხადებით საქართველოს მთავრობის საგარეო ეკონომიკური პოლიტიკის პრიორიტეტად კვლავ რჩება დივერსიფიკაციის გაძლიერება, რა მიმართულებითაც ქვეყანა აქტიურად მუშაობს.