"ამომრჩეველი არ დაუშვებს ხელისუფლებას გადააყოლოს ევროპული პერსპექტივა"

"ამომრჩეველი არ დაუშვებს ხელისუფლებას გადააყოლოს ევროპული პერსპექტივა" - ბაჩუკი ქარდავა ALDE-ს განცხადებაზე

პოლიტიკა - 18:18, 07 Oct, 2015

1557

არასაპარლამენტო ოპოზიციის ლიდერები "ლიბერალებისა და დემოკრატების ალიანსი ევროპისთვის" (ALDE) განცხადებას ეხმაურებიან.
"ეროვნულ - დემოკრატიული მოძრაობის“ ლიდერი ბაჩუკი ქარდავა ამბობს, რომ საქართველოს ხელისუფლებამ ძალიან მკაცრი გართხილება მიიღო.

" ან ხელისუფლება ეტყვის ევროპულ საზოგადოებას, რომ ის არის დემოკრატიული სახელმწიფო და შესაბამისად განახორციელებს იმ რეფორმებს, რომელსაც არჩევნებამდე ქართველ ამომრჩეველს პირდებოდა, ან ის დარჩება ვენესუელასთან ერთად ვლადიმერ პტინის ერთადერთ მეგობრად მსოფლიოში. იმედი მაქვს რომ საქართველოს ხელისუფლებას ეყოფა გონიერება, თუ არა და ქართველი საზოგადოება არ დაუშვებს ხელისუფლებას საქართველოს ევროპული პერსპექტივა გადააყოლოს",- განაცხადა ბაჩუკი ქარდავამ.
"ახალი მემარჯვენეების" ერთ-ერთი ლიდერი მამუკა კაციტაძე კი აცხადებს, რომ, როდესაც ხელისუფლება ამ ტიპის რეკომენდაციებს არ ითვალისწინებს, იღებს მეტ ნეგატივს.
"ნუ გაუკვირდებათ შემდეგ, ისეთი ტიპის განცხადებების მოსმენა როგორიცაა: საქართველო მოიხსნა ევროპის რადარებიდან, რეგრესია საქარტველოს ინტეგრაციის კუთხით ევროპულ სტრუქტურებში და სხვა. ამ რეკომენდაციას უნდა მარტივად გაგონება, დაჯერება და გათვალისწინება",- აღნიშნა მან.
ლიბერალებისა და დემოკრატების ალიანსი ევროპისთვის (ALDE) საქართველოს მთავრობას მიმართავს და 2016 წელს დაგეგმილი საპარლამენტო არჩევნებისთვის საარჩევნო სისტემის რეფორმების გატარებისკენ მოუწოდებს.

„ჩვენ დაწვრილებით გავეცანით პარტიის თანამშრომლების მიმართვას. საქართველოში მნიშვნელოვანი საარჩევნო წელი მოდის, რომელიც იქნება ტესტი დემოკრატიის, მედიის თავისუფლების, პლურალიზმისა და კანონის უზენაესობის თვალსაზრისით. ეს არჩევნები გადაწყვეტს, თუ რა პოზიციაზეა ქვეყანა, როგორც რეფორმატორი, აღმოსავლეთ პარტნიორობის ფარგლებში. მოვუწოდებთ საქართველოს მთავრობას, განახორციელოს საარჩევნო რეფორმები, რომლებიც ხელს შეუწყობს საქართველოს პარლამენტში პლურალიზმის გაძლიერებას.

ასევე მოვუწიდებთ მთავრობას, სამართლებრივი სისტემის მიუკერძოებლობის, დამოუკიდებლობისა და ეფექტურობის გაძლიერებას. ჩვენ გავაგრძელებთ სიტუაციის მონიტორინგს და საქართველოს კურსის მხარდაჭერას სტაბილური დემოკრატიისა და კეთილდღეობისთვის“- ნათქვამია ALDE-ს განცხადებაში.