"ჩვენ გვყავს ყველაფერზე წამსვლელი ხელისუფლება"

"ჩვენ გვყავს ყველაფერზე წამსვლელი ხელისუფლება" - ოპოზიცია "რუსთავი 2"-ზე

პოლიტიკა - 18:24, 06 Oct, 2015

1836

ტელეკომპანია „რუსთავი 2“-ის გარშემო მიმდინარე მოვლენები იყო განხილვის ერთ-ერთი თემა ეროვნულ-დემოკრატიული პარტიის ოფისში გამართულ შეხვედრაზე.
საარჩევნო სისტემასთან დაკავშირებით მომუშავე საინიციატივო ჯგუფის წევრები შეთანხმდნენ, რომ მედიაში მიმდინარე პროცესებზე სპეციალურ განცხადებას შეიმუშავებენ.
ბაჩუკი ქარდავას განცხადებით, ხელისუფლება მძიმე მდგომარეობაშია, ამიტომ კრიტიკულად განწყობილი არხის გაჩუმებას ცდილობს.
"დღევანდელ შეხვედრაზე დავაყენე რუსთავი 2 - ის საკითხი, მედიაზე ზეწოლას უფრო მწვავედ სხვა ფორმატში დავაყენებ, იქ სადაც პოლიტიკურ გადაწყვეტილებას ვიღებთ. რუსთავი 2 ის წინააღმდეგ განვითარებულმა მოვლენებმა აჩვენა, რომ ჩვენ გვყავს ყველაფერზე წამსვლელი ხელისუფლება, ეს კი ჩემთვვის არის წითელი ხაზი, რომლის გადაკვეთას არ დავუშვებთ",- აღნიშნა ქარდავამ.
"ერთიანი ნაციონალური მოძრაობის" წევრის, ხათუნა გოგორიშვილის განცხადებით, ქართველი ხალხი თავისუფალი მედიის გაჩუმებას არ დაუშვებს.
"შევახსენებ, ხელისუფლებას რომელსაც როგორც ჩანს, ძალიან მოკლე მეხსიერება აქვს, რომ რუსთავი 2- ის ხელყოფის პრეცენდენტი უკვე იყო უახლოესი ისტორიის განმავლობაში, რა შედეგი მოჰყვა ამას ეს მე ძალიან კარგად მახსოვს, ხელისუფლებას თუ ამნეზია დაემართა, ვურჩევდი ჩახედონ არქივს" - აღნიშნა გოგორიშვილმა.
"რუსთავი 2" -ის წინააღმდეგ მიმდინარე პროცესები შესაფასა მამუკა კაციტაძემაც.
"ახალი მემარჯვენეების" ერთ-ერთი ლიდერის განცხადებით, პროცესი პოლიტიკური სარჩულის მატარებელია.
"რუსთავი 2" - ის დაყადაღების საკითხის გაყიდვა ხელისუფლებას სურდა, როგორც ორ სუბიექტს შორის არსებული სამართლებრივი დავა. იმთავითვე ჩემი პოზიცია იყო შემდეგში, რომ მედიაში, მათ შორის სხვა ტელევიზიების თოქ-შოუების დახურვა, არჩევნებამდე ერთი წლის თავზე არის ღია პოლიტიკური ბრძოლა" - განმარტა მამუკა კაციტაძემ.