ჯანდაცვის მინისტრი დავით სერგეენკო პრეზიდენტის აშშ-ში ვიზიტის დროს ელჩის არყოფნის საკითხს გამოეხმაურა.

როგორც სერგეენკომ მთავრობის სხდომის დაწყებამდე განაცხადა, რადგან საქართველოდან ამერიკაში ორი დელეგაცია იმყოფებოდა, საელჩოს თანამშრომლები გადანაწილდნენ, რის შედეგად ელჩი პრემიერის დელეგაციაში მოხვდა.

„პროტოკოლში დიდად ჩახედული არ ვარ, მაგრამ როგორც ვიცი ორი დელეგაციის ერთდროულად ყოფნის პირობებში საელჩოს თანამშრომლები გადანაწილდნენ და იყვნენ ორივე დელეგაციასთან. ამჯერად ასე მოხდა, რომ უშუალოდ ელჩი იყო პრემიერთან, ხოლო საელჩოს სხვა მაღალი თანამდებობის პირები - პრეზიდენტთან. ცხადია, რომ ორივე დელეგაციაში ერთდროულად ელჩი ვერ იქნებოდა“, - განმარტა დავით სერგეენკომ.

რაც შეეხება ამერიკასა და საქართველოს შორის ურთიერთობას სერგეენკოს თქმით, ჯანდაცვის და სოციალური უზრუნველყოფის კუთხით ორ ქვეყანას შორის მზარდი ურთიერთობაა.

შეგახსენებთ, გადაცემა "არჩევანში" საქართველოს პრეზიდენტმა გიორგი მარგველაშვილმა განაცხადა, რომ მისი აშშ-ში ვიზიტის დროს ელჩი, არჩილ გეგეშიძე მას არც კი მისალმებია.