”შემთხვევებზე მეც მსმენია, თუმცა ამის საბუთი არ მაქვს”- პრეზიდენტი არაფორმალურ მმართველობაზე

პოლიტიკა - 00:15, 06 Oct, 2015

1859

საქართველოს პრეზიდენტის განცხადებით ქვეყანაში არსებული არაფორმალური მმართველობის შესახებ სმენია, თუმცა ამის საბუთი არ აქვს. გიორგი მარგველაშვილის თქმით მის შემთხვევაში ასეთი მმართველობა არ ხორციელდება. ამის შესახებ პრეზიდენტმა გადაცემა ”არჩევანში” ისაუბრა. მისი შეფასებით არაფორმალურ მმართველობის უარყოფით შედეგებზე მთავარი პასუხისმგებლობა იმ ადამიანებს ეკისრებათ, ვინც საკუთარ თანამებობას პატივს არ სცემს და საშუალებას იძლევა არაფორმალურად იმართებოდეს:

„არ არსებობს არც ერთი საკითხი, რომელზეც ვიტყოდი, რომ მე ვიღებ რაიმე პოზიციას და ასე ვმართავ. სხვა შემთხვევებზე მეც მსმენია, თუმცა მე არავითარი ამის საბუთი არ მაქვს, თუ ვინმე პოლიტიკურ გადაწყვეტილებებს იღებს არა თავისი შეხედულებებიდან - არა თავისი შინაგანი რწმენით, არა იმ ვალდებულებებიდან გამომდინარე, რომელიც თვითონ გასცა, არა იქედან გამომდინარე, რაც თვითონ მიაჩნია სწორი, არამედ რაღაც სხვა მიზეზებიდან გამომდინარე ჩვენ ამ პრობლემის გადაწყვეტა ამ ადამიანებში უნდა ვეძიოთ… მე არც იმას გამოვრიცხავ, რომ ზოგ შემთხვევაში არანაირი არაფორმალური მმართველობა არ არსებობს, უბრალოდ არსებობს სურვილი, რომ საკუთარი შეცდომა სხვას გადააბრალო. ამ კითხვის ადრესატები არიან ის პირები, რომლებსაც აქვთ შინაგანი შეგრძნება, რომ ქვეყანა უნდა იმართებოდეს სხვანაირად და ისინი ამ მაღალი თანამდებობიდან სხვა გადაწყვეტილებებს იღებენ - მე ვფიქრობ, რომ ეს მათთვის მოსაკითხი საკითხია,“ - განაცხადა გიორგი მარგველაშვილმა.