რა ხდება მარნეულში - "თავისუფალი დემოკრატები" განცხადებას ავრცელებენ

პოლიტიკა - 16:16, 05 Oct, 2015

3001

გავრცელებული ინფორმაცია პარტია ,,თავისუფალი დემოკრატების“ მარნეულის ორგანიზაციის თავმჯდომარის პარტიიდან წასვლის, ასევე, ორგანიზაციის 300 წევრის დატოვების შესახებ, სიმართლეს არ შეესაბამება.
ამის შესახებ პარტიის მიერ გავრცელებულ განცხადებაშია ნათქვამი.
"მარნეულის ორგანიზაციის თავმჯდომარე ისპან ქარიმოვი, რომელიც სამი კვირის წინ მარნეულის ორგანიზაციის გამგეობის მიერ იქნა თავმჯდომარედ არჩეული, სხვა წევრებთან ერთად განაგრძობს საქმიანობას. რაც შეეხება რამიზ გულმამედოვს - ის თანამდებობიდან გადაყენებული იქნა გამგეობის მიერ, რისი მიზეზიც მისი არაეფექტური მუშაობა და კოალიცია ,,ქართულ ოცნებასთან“ მისი ფარული თანამშრომლობის შესახებ ინფორმაცია გახდა. ასევე, არ შეესაბამება სიმართლეს ინფორმაცია იმის შესახებ, რომ მარნეულის საკრებულოში დაიშალა ფრაქცია ,,თავისუფალი დემოკრატები“, ვინაიდან აღნიშნული ფრაქცია ჯერ კიდევ 2014 წლის ნოემბერში დაიშალა. მას შემდეგ, რაც ,,თავისუფალმა დემოკრატებმა“ კოალიცია დატოვეს, გულმამედოვის ხელმძღვანელობით მარნეულის რაიონულ ორგანიზაციაში პრაქტიკულად არანაირი სამუშაო არ ტარდებოდა. სწორედ ამიტომ გიულმამედოვმა გამგეობის სხდომაზე მიიღო სიტყვიერი გაფრთხილება, რასაც მოყვა მისი ულტიმატუმი და მუქარა - თუ მას თავმჯდომარეობიდან გადააყენებდნენ, ის ,,ქართულ ოცნებაში“ გადავიდოდა. დღევანდელი მისი განცხადებით დადასტურდა მისი კავშირები კოალიციასთან", - ნათქვამია განცხადებაში.