არასაპარლამენტო ოპოზიციის წარმომადგენლები ტელეკომპანია „რუსთავი 2“-ის გარშემო მიმდინარე მოვლენებს ეხმაურებიან და ამბობენ, რომ სახეზეა პოლიტიკური დევნის მაგალითი.

მათი თქმით, „ხელისუფლებამ მედიასთან ბრძოლის სახიფათო გზა აირჩია.

„ბუნებრივია, თუ „რუსთავი 2“ იქნება იგივე ამპლუაში, რაშიც დღეს იმყოფება და თუ ის განსხვავებულ აზრს და პოზიციას დააფიქსირებს და გააგებინებს საზოგადოებას, თუ რა ხდება რეალურად ქვეყანაში საგარეო თუ საშინაო პოლიტიკის კუთხით, ბუნებრივია ხელისუფლებისთვის 2016 წელს არასახარბიელო შედეგი იქნება. არ იქნება „რუსთავი 2“ და ამ კოდექსის ფონზე შედეგი იქნება ისეთი, როგორიც მათ სურთ და არა ისეთი, როგორიც ქართველ ხალხს სურს“, - ამბობს ეროვნულ-დემოკრატიული პარტიის ლიდერი ბაჩუკი ქარდავა.

„ახალი მემარჯვენეების“ ერთ-ერთი ლიდერის მამუკა კაციტაძის თქმით, „რუსთავი 2“-თან დაკავშირებული საკითხი ხელისუფლებისთვის შესაძლოა გარდამტეხი აღმოჩნდეს.

„ხელისუფლებამ მედიასთან ბრძოლის სახიფათო გზა აირჩია. ვფიქრობ, ეს საკითხი შეიძლება გამოდგეს გარდამტეხი ამ ხელისუფლების ამ მდგომარეობაში ყოფნისა - მხედველობაში მაქვს შეუვალი და შეუსმენადი დამოკიდებულება ზოგადად ყველას მიმართ, ვისაც განსხვავებული აზრი აქვს“, - ამბობს კაციტაძე.

„სამოქალაქო ალიანსი თავისუფლებისთვის“ თავმჯდომარის ზურაბ ხარატიშვილის თქმით კი ხელისუფლება ხელისუფლება ოპოზიციური ძალების და ოპოზიციურად განწყობილი მედიის მიმართ კანონს არამართებულად იყენებს.

„რუსთავი 2“-ის შემთხვევაშიც ასე ხდება. აქ სამართლებრივი საკითხები უკან არის და წინა პლანზე წამოწეულია პოლიტიკური დევნის მაგალითი“, - ამბობს ხარატიშვილი.