"რატომ უნდა მოიცადოს დემოკრატიამ 2020 წლამდე" - ოპოზიცია საარჩევნო სისტემასთან დაკავშირებით დიპკორპუსს შეხვდა

პოლიტიკა - 13:27, 05 Oct, 2015

1578

პარლამენტში საარჩევნო და საკონსტიტუციო ცვლილებებთან დაკავშირებით ფრაქცია თავისუფალი დემოკრატების გაფართოებული სხდომა გაიმართა, რომელსაც საპარლამენტო და არასაპარლამენტო ოპოზიცია, დიპლომატიური კორპუსი და საერთაშორისო და ადგილობრივი არასამთავრობო ორგანიზაციების წარმომადგენლებიც ესწრებოდნენ.

ოპოზიციის წარმომადგენლების განცხადებით, ისინი დიპლომატიურ კორპუსს საარჩევნო რეფორმასთან დაკავშირებით საკუითარ ხედვას გააცნობენ და საარჩევნო კოდექსის ცვლილების აუცილებლობას კიდევ ერთხელ გაუსვამენ ხაზს. ოპოზიციის შეფასებით სამართლიანი არჩევნების ჩატარებისთვის საჭიროა 2016 ელის არჩევნები პროპორციული სისტემით ჩატარდეს.

„ეს სისტემა, რომლითაც ხელისუფლება არჩევნების ჩატარებას აპირებს, არის კიდევ უფრო უკან გადადგმული ნაბიჯი. ერთი რეალური გამოსავალი, არის სამხარეო პროპორციული სიების შემოღება, რომელიც უზრუნველყოფს, რეალურ, სამართლებრივ საარჩევნო სისტემას“- განაცხადა „თავისუფალი დემოკრატების“ ერთ-ერთმა ლიდერმა ზურაბ აბაშიძემ.

„ნაციონალური მოძრაობის“ წევრის აკაკი ბობოხიძის შეფასებით, ხელისუფლების მხრიდან შემოთავაზებული საარჩევნო კოდექსი აბსურდულია , რადგან ამ კოდექსის მიხედვით ხელოვნურად არის გაერთიანებული ისეთი ადმინისტრაციული ერთეულები, რომლებსაც ერთმანეთთან გეოგრაფიული საზღვარიც არ გააჩნიათ.

„სრულ აბსურდამდე მივდივართ, როდესაც ერთმანეთთან ხელოვნურად გაერთიანებულია ისეთი ადმინისტრაციული ერთეულები, რომლებსაც ერთმანეთთან გეოგრაფიული საზღვარიც კი არ აქვს. ერთპალატიან სისტემაში მაჟორიტარულ სისტემას სერიოზული ხარვეზები აქვს, ეს გულისხმობს იმას, რომ წაგებული პარტია, მაჟორიტარების ხარჯზე შეიძლება უცებ გადაიქცეს გამარჯვებულ პარტიად, მან შეიძლება მიიღოს 30% პროპორციულ არჩევნებში, ხოლო მაჟორიტარების ხარჯზე მოიპოვოს უმრავლესობა.“- აღნიშნა აკაკი ბობოხიძემ.

კოდექსის აუცილებელ ცვლილებაზე აკეთებს აქცენტს არასაპარლამენტო ოპოზიციაც. მათი თქმით ცვლილებების 2020 წლისთვის გადადებით ხელისუფლება ძალაუფლების მიტაცებას ცდილობს. ოპოზიცია 2016 წლის არჩევნების ლეგიტიმაციასაც კითხვის ნიშნის ქვეშ აყენებს.

„ხელისუფლება ცდილობს მიიტაცოს 2016 წლის არჩევნების შედეგები. მოახდინოს ხელისუფლების უზურპაცია. მათ იმედი აქვთ, რომ მოიპოვებენ საკონსტიტუციო უმრავლესობას და როგორც ამ წინა არჩევნების წინ გაცემული არცერთი დაპირება არ შესრულებულა, მომავალი არჩევნების შემდეგაც დაპირებების შესრულების იმედი არ უნდა გვქონდეს. ჩემთვის გაუგებარია რატომ უნდა მოიცადოს დემოკრატიამ 2020 წლამდე და რატომ არ უნდა გვქონდეს დემოკრატია 2016-ში“- განაცხადა ეროვნულ დემოკრატიული პარტიის ლიდერმა ბაჩუკი ქარდავამ.

პოლიტიკური გაერთიანების „სამოქალაქო ალიანსი თავისუფლებისთვის“ თავმჯდომარის ზურაბ ხარატიშვილის განცხადებით ხელისუფლება საარჩევნო კოდექსთან დაკავშირებით დიალოგზე არ მოდის და დღევანდელი

ხელისუფლება ამ თემაზე დიალოგზე არ მოდის, ეს ჩვენთვის ერთ-ერთი ბოლო მცდელობაა რომ პარლამენტის ფორმატში, ღია ფრაქციის სხდომაზე დიპლომატებთან ჩვენი პოზიცია კიდევ ერთხელ დავაფიქსიროთ და ვაჩვენოთ, რომ ხელისუფლების მხრიდან დიალოგზე არ წამოსვლა ამძიმებს პოლიტიკურ სიტუაციას და მდგომარეობა პოლიტიკური კრიზისისკენ მიყავს. ამ პოლიტიკური კრიზისის პასუხისმგებლობა კი ხელისუფლებას დაეკისრება“- განაცხადა ხარატიშვილმა.