არ მივიღებ არჩევნებში მონაწილეობას გეგა გობეჯიშვილის გამოშვებამდე

არ მივიღებ არჩევნებში მონაწილეობას გეგა გობეჯიშვილის გამოშვებამდე - რეზი არველაძე

პოლიტიკა - 11:25, 03 Oct, 2015

3374

ფეხბურთის ფედერაციის პრეზიდენტობის კანდიდატი რეზი არველაძე გეგა გობეჯიშვილის გათავისუფლებას ითხოვს და აცხადებს, რომ მის გამოშვებამდე არ აპირებს არჩევნებში მონაწილეობის მიღებას.

ამის შესახებ რეზი არველაძემ სასტუმრო "ჰოლიდეი ინში".

"მოვუწოდებ ყველას, სანამ გეგა გობეჯიშვილი არ გათავისუფლდება, მანამდე არ დაიწყოს საარჩევნო ყრილობა. ეს არის ჩემი თხოვნაც, მოწოდებაც და ამაში ვარ მართალი. ეს იქნება ყველაზე სწორი გადაწყვეტილება ამ დროისთვის", - განაცხადა არველაძემ.

საქართველოს ფეხბურთის ფედერაციის დელეგატი და პრეზიდენტობის კანდიდატის, რეზი არველაძის მხარდამჭერი გეგა გობეჯიშვილი პოლიციამ ნარკოტიკული საშუალებების მოხმარებისთვის დააკავა. როგორც გობეჯიშვილის მეუღლე, თათა ხუნდაძე მაესტროს ეთერში აცხადებდა, გობეჯიშვილის ადგილსამყოფელის შესახებ დროის გარკვეულ მონაკვეთში ოჯახს და მეგობრებს ინფორმაცია არ ჰქონდათ. ხუნდაძისვე განმარტებით, გობეჯიშვილზე ზეწოლა რამდენიმე დღის განმავლობაში მიდიოდა და მას ლევან კობიაშვილის მხარდაჭერას სთხოვდნენ.

გეგა გობეჯიშვილის საქმეზე თბილისის საქალაქო სასამართლოში პროცესი შაბათს, 3 ოქტომბერს ჩაინიშნა, თუმცა ამ მომენტისთვის პროცესის დაწყების დრო უცნობია.

ამ საკითხთან დაკავშირებით რევაზ არველაძემ გვიან ღამით ფეისბუქის საკუთარ გვერდზე განცხადება გაავრცელა:

“გეგა გადაიყვანეს წინასწარი დაკავების იზოლატორში, დიღომში, ქალაქის სამმართველოში (ესე გვეუბნებიან). ველოდებით გონივრულ გადაწყვეტილებას – მის გამოშვებას. თუ ეს არ მოხდა და მალე არ მოხდა, ჩემს მეგობრებთან ერთად ვიდგები ბოლომდე. არ მივიღებ არჩევნებში მონაწილეობას მის გამოშვებამდე და მხოლოდ მისი გამოშვების შემდეგ მივიღებ გადაწყვეტილებას შემდგომი ნაბიჯების შესახებ. ისევ და ისევ, მოვუწოდებ ყველა დელეგატს გამოხტონ პოზიცია და დაგვიდგნენ გვერდით!!“ –წერდა რეზი არველაძე.

შეგახსენებთ, რომ საქართველოს ფეხბურთის ფედერაციის პრეზიდენტის არჩევნები შაბათს, 3 ოქტომბერს ჩატარდება. ფედერაციაში სულ 34 დელეგატია, კანდიდატი კი იმ შემთხვევაში გაიმარჯვებს თუ 18 დელეგატის ხმას მოიპოვებს. თუ 18 ხმას ვერცერთი კანდიდატი მიიღებს, გაიმარჯვებს ის, ვინც დამსწრეთა უმრავლესობის ხმას მოიპოვებს