"სიტყვის თავისუფლება საფრთხეშია" - "რეფორმატორთა კლუბი" რუსთავი 2"-თან დაკავშირებით

პოლიტიკა - 12:49, 02 Oct, 2015

1320

"რეფორმატორთა კლუბმა" განცხადება გააკეთა ტელეკომპანია "რუსთავი 2" -ის არგვლივ განვითარებულ მოვლენებთან დაკავშირებით:
"საერთაშორისო სამართლითა და კონსტიტუციით გარანტირებული სიტყვის თავისუფლების უზრუნველყოფის ძირითად საშუალებას წარმოადგენს თავისუფალი მედია.
სწორედ ამიტომაც მედიას დასავლურ საზოგადოებაში აიგივებენ ხელისუფლების დამატებით, მეოთხე შტოსთან, როგორც დემოკრატიის მნიშვნელოვან ელემენტს.
ის ფაქტი, რომ გაურკვეველი, ბუნდოვანი გარემოებების საფუძველზე ქონების დაყადაღება ხორციელდება საქართველოში ისეთი წარმატებული, მაღალი რეიტინგის მქონე და დამოუკიდებელი მედიასაშუალების მიმართ, როგორიცაა ,,რუსთავი2", და ამ პროცესებში ურთიერთშეთანხმებულად მონაწილეობას ღებულობს სასამართლო და აღმასრულებელი ხელისუფლება - იუსტიციის სამინისტროს საჯარო რეესტრის სააგენტო, ნათელს ჰფენს ამ პროცესის პოლიტიკურ, ხელისუფლების მიერ მართულ ხასიათს.
აღნიშნული კი რეალური საფრთხის ქვეშ აყენებს არა მარტო ,,რუსთავი2"- ის საქმიანობას, არამედ ზოგადად თავისუფალ მედიას და შესაბამისად სიტყვის თავისუფლებას, როგორც დემოკრატიული საზოგადოების ფუნდამენტს.
`რეფორმატორთა კლუბი"