არასამთავრობო ორგანიზაციები ტელეკომპანია „რუსთავი 2“-ის გარშემო მიმდინარე მოვლენებს ეხმაურებიან.

„საერთაშორისო გამჭირვალობა - საქართველოს“ აღმასრულებელი დირექტორი ეკა გიგაური არ გამორიცხავს, რომ პროცესებში გარკვეული წრეების და მთავრობის დაინტერესება იყოს.

„ყველამ ყურადღება უნდა მიაქციოს და ყოველდღიური მონიტორინგი განახორციელოს ამ საქმეზე იმ მიზეზის გამო, რომ „რუსთავი 2“ არის ყველაზე რეიტინგული ტელეკომპანია. მისთვის ქმედებების შეზღუდვა ძალიან დიდი პრობლემაა ამ ქვეყნებისთვის. ჩანს, რომ გარკვეული წრეების და მთავრობის დაინტერესება ამ ყველაფერში შესაძლოა არის, რადგან ამ პროცესში ძალიან ბევრი პროცედურა დარღვეულია. შეუძლებელია, დამთხვევა იყოს,“ - აცხადებს ეკა გიგაური.

„სამართლიანი არჩევნების“ აღმასრულებელი დირექტორის ნინო ლომჯარიას თქმით, იმ გარემოებების გათვალისწინებით, რომ ჯერ კიდევ პირველ ყადაღაზეც არ არის გადაწყვეტილება მიღებული და საკმაოდ გაწელილია პროცესები, რჩება იმის შთაბეჭდილება, რომ სასამართლო არ ცდილობს პროცესი წაიყვანოს გამჭვირვალედ.

„სასამართლოს განჩინება არის სანახავი. როგორც ჩვენ „რუსთავი 2“-ის ადვოკატებისგან მოვისმინეთ, ამ ეტაპზე ჩანს ის, რომ იმ გარიგებით, რაც იგეგმებოდა, არ ხდებოდა „რუსთავი 2“-ის რაიმე სახით ვალდებულებით დატვირთვა. პირიქით ხდებოდა ინვესტირება. შესაბამისად ინვესტირების ხელის შეშლა შესაძლოა მიზნად ისახავდეს იმას, რომ ტელეკომპანიას ფინანსური პრობლემები შეექმნას“, - ამბობს ლომჟარია.

პროცესებს ეხმაურება მედიაექსპერტი ნინო დანელიაც. მისი თქმით, ხელისუფლება „რუსთავი 2“-ზე ზეწოლას ახორციელებს.

„იმ ინფორმაციის საფუძველზე, რაც მაქვს, შემიძლია დასკვნა გამოვიტანო - ეს არ არის სამართლებრივი პროცესი, ეს არის პირდაპირი პოლიტიკური დაკვეთა. ეს არის ბიძინა ივანიშვილის კარზე შემდგარი გარიგება და შეთანხმება“, - აცხადებს ნინო დანელია.