„დამოუკიდებელი თამაში თუ უნდა, გადადგეს"

„დამოუკიდებელი თამაში თუ უნდა, გადადგეს" - მეჭიაური პრეზიდენტზე

პოლიტიკა - 14:02, 01 Oct, 2015

2213

პარლამენტის საფინანსო-საბიუჯეტო კომიტეტის თავმჯდომარე თამაზ მეჭიაური პრეზიდენტ გიორგი მარგველაშვილს გადადგომისკენ მოუწოდებს.

ამის შესახებ „ნიუპოსტს“ „ქართული ოცნების“ წევრმა მარგველაშვილის იმ განცხადების საპასუხოდ განუცხადა, რომლის მიხედვითაც, მარგველაშვილი საპრეზიდენტო ვადის ამოწურვის შემდეგ პოლიტიკაში დარჩენას გეგმავს.

„თუ ის დამოიკიდებლად რაიმეს შეცვლას მოახერხებს მხოლოდ მივესალმები. თუ მარგველაშვილი გადაწყვეტს მომდევნო საპრეზიდენტო არჩევნებში იყაროს კენჭი, მას ამომრჩეველთა დიდი ნაწილი მხარს არ დაუჭერს. თუ მართლა უნდა დამოუკიდებელი თამაში, გადადგეს. მე მის ადგილზე გადავდგებოდი, შემოვიკრებდი იმ გუნდს, რომელიც რეალობაში არის მისი თანამოაზრეები. გიორგი მარგველაშვილის გადადგომის შემდეგ, ისედაც დაინიშნება ვადამდელი არჩევნები და იქ გამოჩნდება ვინ დაუჭერს პრეზიდენტს მხარს.“- განაცხადა უმრავლესობის დეპუტატმა.

მეჭიაური მარგველაშვილის თანამოაზრეებად ნაციონალურ მოძრაობას და რიგ არასამთავრობოებს ასახელებს.

„თუ მარგველაშვილმა შემდეგ არჩევნებში კენჭი იყარა, მის გვერდით ვიხილავთ, ნაციონალებს, ყოფილ ნაციონალებს და იმ არასამთავრობო სექტორს, ვინც მის ირგვლივ შემოიკრიბა.“ - განუცხადა პარლამენტის წევრმა „ნიუპოსტს“.

მარგველაშვილმა ვაშინგტონში, საქართველოს საელჩოში გამართულ შეხვედრაზე განაცხადა, რომ მას აქვს უმნიშვნელოვანესი პოსტი და ცდილობს საკუთარი შესაძლებლობის ფარგლებში ემსახუროს ქვეყანას.

"მე პოლიტიკაში ვიყავი, ვარ და იმედი მაქვს აქტიურ პოლიტიკაში დავრჩები." - განაცხადა პრეზიდენტმა.